Noordnederlandse Historiebijbel

11 capittel

Ende omtrent een maent daerna doe quam Naas, die coninc van den Amoniten, ende begonden te vechten jegen die van Jabes in Galaad. Doe seide die overste van den stede van Jabes tot Naas: "Laet ons mit vreden. Wi sellen u dienen." Doe seide Naas: "Ic sel u mit vreden laten op een voerwaerde. Dat is, dat ic alle die mannen van Jabes haren rechter oge uutsteke." Doe seiden die outste van Jabes: "Gevet ons seven dagen respijt. Wi sellen boden senden tot dien van Ysrahel. Is daer nyement die ons bescermt, so sellen wi tot u comen."

Doe quamen die boden in Galaath tot Saul ende seiden hem hoe dat die van Jabes belegen waren ende wat si geloeft hadden. Doe dat gemeen volc van Ysrahel dat hoerden, doe worden si ropende ende screyende. Ende siet, Saul die quam van den acker ende volchde sijn ossen ende seide: "Waerom so screyt dat volc also?" Doe wort hem geseit hoe die van Jabes belegen waren

[fol. 114vb]

ende wat si beloeft hadden. Doe Saul dat gehoert hadde, doe wort hi verstoert. Ende die geest Gods quam in hem. Ende hi versloech beide sijn ossen. Ende hi sende boden overal in Ysrahel die seiden: "So wie Saul ende Samuel niet en volcht, die sel men sijn ossen verslaen, gelijc Saul sijn ossen versloech." Doe was al dat volc van Ysrahel bevreest. Ende si togen alle uut mit enen wille ende quamen in Bezech. Ende der mannen van Ysrahel die wasser 300.000 ende van Juda wasser 30.000.

Doe seiden die princen tot den boden: "Sect den mannen van Jabes dat si morgen verlost sellen wesen." Doe quamen die boden ende seiden dat die mannen van Jabes. Doe waren si verblijt. Ende si seiden tot Naas, den coninc: "Morgen sellen wi tot u comen. Ende gi selt mit ons doen dat gi wilt." Ende het is gesciet. Saul ordineerde sijn volc an drien betaelgen. Ende omtrent middernacht doe quamen si onder dat volc voir daech ende verstroeydense, sodatter niet twee tegader en bleven.

Doe seide dat ghemeen volc tot Samuel: "Waer sijn nu diegene die seiden: Saul en sel ons niet regieren? Laet ons die mannen nu verslaen." Doe seide Saul: "Gi en selt nu nyement verslaen, want huyden heeft God salicheit onder ons gewrocht." Doe seide Samuel tot den volc: "Coemt ende laet ons

[fol. 115ra]

gaen in Galgala ende laet ons daer onsen nyeuwen coninc eren." Ende doe toech al dat volc in Galgala ende offerden daer Gode ende deden daer sacrifici. Ende daer was Saul ende dat gemeen volc seer verblijt.