Noordnederlandse Historiebijbel

13 capittel

Doe Saul twee jaer coninc geweest hadde, doe coes hi uut Ysrahel 3.000 stercker mannen; 2.000 hielt Saul bi hem in Machmas, in dien berch Betel; ende bi Jonathas wasser 1.000 in Galaad Benyamins. Ende dat ander volc toech tot sijnre woensteden. Daerna doe wan Jonathas een heydensche stede die lach in Gabaa. Ende hi versloech al dat volc. Doe dat die Filisteen hoerden, doe vergaderden si voel volcs om dat te wreken. Ende dat vernam Saul. Ende hi dede sijn trompet blasen onder al dat volc van Ysrahel. Ende doe die van Ysrahel die saec vernamen, doe volchden si haren coninc. Ende Saul die wan een heydensche stede ende versloech al dat volc. Doe vergaderden die Philisteen 30.000 wagenen mede te striden jegen die van Ysrahel ende 6.000 ridders te paerde. Ende dat ander volc was ontellic gelijc dat sant bi der zee. Ende si quamen in Machmas. Doe die van Ysrahel dat vernamen, doe weken si in speluncken, in cystaernen, in steenroedsen ende in hagedochten. Ende somme liepen si over die Jordaen int lant van Gad

[fol. 115vb]

ende van Galaad. Ende Saul die was in Galgala. Ende die bi hem waren, die waren vervaert. Ende Saul die beide seven dagen na Samuel, mer hi en quam niet. Doe dede Saul hem offerhande halen ende dede Gode sacrifici jegen die wet.

Ende doe Saul die sacrificie gedaen hadde, doe quam Samuel. Doe ghinc Saul hem jegen ende gruetede hem. Doe seide Samuel tot Saul: "Wat heb gi gedaen?" Doe seide Saul: "Ic sach dat mi dat volc ontoech ende gi en quaemt niet tot mi. Ende die Philisteen waren vergadert in Machmas. Ende ic meende dat si mi versoken souden in Galgala. Daerom so dede ic Gode sacrifici." Doe seide Samuel tot Saul: "Gi hebt dwaselic gedaen: gi en hebt dat gebot Gods niet gedaen dat Hi u geboet. Daerom en sel uwe macht niet meer risen. Mer God heeft een man versien na sijnre herten ende die sel here wesen over sijn volc, omdat gi sijn geboden niet gehouden en hebt."

Doe ghinc Samuel in Galgala. Ende doe vergaderde Saul 600 man ende toech mit Jonathas in Gabaa. Ende doe quam dat volc weder bi Saul dat gevlogen was in speluncken ende in kuylen.

Ende die Filisteen haddent gemaect ende vercregen dat men onder die van Ysrahel geen swaerden, noch glavien, noch wapen en smede. Ende

[fol. 116ra]

daer en hadde nyement swaert dan Saul ende Jonathas. Ende die van Ysrahel scarpten haer kuteren, haer haken, haer riecken, haer bilen ende ander instrumenten daer si mede te stride togen.