Noordnederlandse Historiebijbel

9 capittel

Ende daer was een man van

[fol. 113rb]

Benyamins geslacht, die was genoemt Cys, ende hadde enen stercken, cloken soen, die hiet Saul. Die was uutvercoren ende guet. Ende onder die kinder van Ysrahel en was geen beter dan hi en was. Ende hi was sijn hoeft langer dan enich man van Ysrahel.

Cys, sijn vader, die waren ezelen ontstreken. Doe seide hi tot Saul, sinen soen: "Neemt een van den knechten mit u ende gaet ende soect die ezelen." Doe ghinc Saul mit den knecht ende socht in dat gebercht van Effraym ende voertan al dat lant omme, mer si en vonden niet. Doe seide Saul tot sinen knecht: "Laet ons weder thuysgaen. Mijn vader sel voir ons besorcht wesen, omdat wi so lange merren." Doe seide die knecht: "Siet, in die stede is een man Gods. Laet ons daer gaen. Ter avontueren hi sel van onsen wech wel weten." Doe seide Saul: "Laet ons daer gaen. Mer wi en hebben niet broet noch wijn dat men den man Gods mach geven." Doe seide die knecht: "Siet, ic hebbe enen sulveren penninc. Die sellen wi den man Gods geven. Ende hi sel ons onsen wech wisen." Doe seide Saul: "Dat is guet raet. Laet ons daer gaen." Ende doe ghingen si ter stede waert. Doe quamen daer

[fol. 113va]

maechden uut der stede om water te putten. Dien vraechde Saul of daer een propheet in der steden woende.

Die maechden seiden: "Ja. Hi gaet daer voir u in die stede, want hi sel huyden sacrifici doen." Ende doe Saul mit den knecht quam midden in die stede, doe quam hem Samuel jegen. Ende God die openbaerde Samuel dat dat diegene was dien hi salven soude coninc te wesen over Ysrahel. Doe ghinc Saul tot Samuel ende seide: "Ic bidde u, segt mi, waer staet dat huse des propheten?" Doe seide Samuel: "Ic ben die man die gi soect. Gaet mit mi hierboven ende eet. Ic sel u morgenvroech laten gaen. Ende ic sel u seggen al dat gi in uwer herten hebt van uwen ezelen die gi eergisteren verloert. Sorcht daer niet voer: si sijn gevonden, want si horen een die beste van Ysrahel toe ende dat is u vader." Doe seide Saul: "Ic ben van dat mintste geslacht ende van dat joncste van Ysrahel, als van Benyamin. Waerom spreect gi dan also tot mi?"

Doe nam Samuel Saul ende sinen knecht ende beval sinen koc dat men hem teten voirsetten soude. Ende doe wijsdese Samuel op eenre solre daer si sliepen. Des morgens doe riep Samuel an Saul

[fol. 113vb]

ende seide: "Staet op, so moech gi gaen." Saul stont op mit sinen knecht ende si ghingen mit Samuel buten der steden. Doe seide Samuel tot Saul: "Segt uwen knecht dat hi een luttel voirgaet. Ic sel u dat woert Gods toespreken."