Noordnederlandse Historiebijbel

8 capittel

Het is gesciet doe Samuel out wort, doe settede hi sijn kinderen te regieren over die

[fol. 112vb]

kinder van Ysrahel. Ende die outste hiet Yohel ende die ander hiet Abya. Ende die kinderen volchden den vader Samuel niet na in doechden, mer si waren geneicht tot giricheit. Ende si namen giften om recht te doen. Ende si verkeerden dat recht.

Doe vergaderden die outste van Ysrahel ende quamen tot Samuel in Ramatha ende seiden: "Siet, Samuel, gi wort out ende uwe kinderen en volgen uwen wech niet na in rechtvaerdicheit. Daerom, set enen coninc die al dat volc van Ysrahel regiert ende onse rechter is." Die woerden en genoechden Samuel niet wel, omdat si seiden: "Set ons enen coninc die onse rechter is." Ende Samuel bat Gode an om die saec.

Doe seide God tot Samuel: "Hoert die stemme des volcs, dat si u toespreken, want si en versmaden u niet, mer si versmaden Mi. Ende si en willen niet dat Icse regier, mer si hebben Mi altoes willen laten ende afgoden gedient. Mer hoert haer stemme ende segt haer dat recht des conincs die regieren sel."

Doe sprac Samuel die woerden Gods tot den volc die een coninc geerden, ende seide: "Gi wilt enen coninc hebben. Hoert dat recht des conincs. Heb gi enen coninc, die sel u kinderen nemen. Ende si sellen sijn voerlopers wesen. Ende si sellen

[fol. 113ra]

sijn wagenen trecken gelijc paerden. Ende hi sel trybuyt ende scattinge op hem setten. Ende si sellen sijn ackeren moeten eren ende sijn coren maeyen. Si sellen sijn harnasch ende sijn wagenen moeten smeden ende tymmeren. Ende u dochteren die sellen hem sijn salve bereiden, sijn spijs koken ende sijn broet backen. U ackeren, u wijngaerden, u olijfbomen daer sellen si die beste uutkyesen ende gevense sinen knechten. Ende op u coren ende op u wijngaerden sel hi tiende setten. Die sel hi sijn camerlinghen geven ende sijn gesin. Ende u knechten ende u dienstmaechden ende u ezelen die sel hi nemen ende settense in sinen werc. Ende op u beesten sel hi tiende setten. Ende gi selt sijn knechten wesen. Ende in dien dage so sel gi Gode clagen mit groten ropen over uwen coninc. Ende in dien dage en sel u God niet horen, omdat gi om den coninc gebeden hebt." Mer dat volc en woude Samuels stemme niet horen ende seiden: "Ten sel also niet gescien. Mer hi sel onsen coninc wesen. Ende hi sel ons regieren ende hi sel onse voirvechter wesen." Doe Samuel die woerden hoerde, doe vertelde hise voer Gode. Doe seide God tot Samuel: "Hoert die woerden des volcs ende set hem enen coninc." Doe seide Samuel tot den mannen van Ysrahel: "Een ygelic die gae thuyswaert. God die sel u enen coninc setten."