Noordnederlandse Historiebijbel

7 capittel

Die van Caryatharim die quamen ende haelden die arke Gods ende voerdense in

[fol. 112rb]

Gabaa ende settense in Amynadaps huys. Ende si heilichden Aleazarus, sinen soen. Ende die bewaerde die arke Gods. Ende aldaer bleef die arke Gods staen 20 jaer lanc.

Doe seide Samuel tot den gemenen volc van Ysrahel: "Keert u mit alle uwer herten tot Gode. Ende doet die afgoden Baal ende Astraoth uut uwen lande. Ende bereet u herte tot Gode ende dient alleen den almachtigen God. Hi sel u wel bescermen voer die handen der Philisteen." Doe deden die kinder van Ysrahel die afgoden wech. Ende si dienden alle den almachtigen God. Doe seide Samuel: "Vergadert alle dat gemeen volc van Ysrahel in Masfat ende ic sel daer Gode voir u allen bidden." Doe vergaderden die kinder van Ysrahel in Masfat ende vasteden daer ende deden penitencie ende seiden: "Here God, wi hebben voer U gesondicht." Ende Samuel bat voer hem allen.

Doe die Philisteen hoerden dat die kinder van Ysrahel in Masfat waren vergadert, doe vergaderden si een groet heer van volc ende wouden jegen die kinder van Ysrahel striden. Ende doe die kinder van Ysrahel dat vernamen,

[fol. 112va]

doe waren si vervaert ende seiden tot Samuel: "Here, en laet niet of, gi en bid altoes God voer ons, dat Hi ons bescerme voir die handen der Philisteen." Doe nam Samuel een sugende lam ende offerdet Gode tot eenre sacrificien. Ende hi bat voir die van Ysrahel ende God die verhoerde hem. Die Philisteen quamen ende wouden die kinder van Ysrahel anstriden. Ende God dedet op hem donren ende die aerde onder hem beven, sodat si vluchtich worden. Ende die van Ysrahel vervolchdense ende sloger voel doot.

Ende doe settede Samuel daer enen groten steen daer haer lant sceide ende noemden `Helpsteen'. Also halp God den kinder van Ysrahel.

Also lange als Samuel leefde, so en versetten die Philisteen hem niet meer jegen die van Ysrahel. Ende die steden die si hem ofgewonnen hadden, die keerden weder an Ysrahel. Ende Samuel regierde die van Ysrahel also lange als hi levede. Ende in Ramatha daer hi woende, daer maecte hi Gode een outaer ende dede Hem daer sacrifici.