Noordnederlandse Historiebijbel

[fol. 92ra]

Hier beghint dat boec der Rechteren

Dat eerste capittel

Doe Josue doot was, doe begheerden die kinder van Ysrahel enen here, enen rechter die mit hem te stride soude varen. Doe vraechde Finees, die priester, Gode raets. Doe seide God: Judas van Judas geslacht, die soude Hi dat lant in sinen handen geven.

Doe seide Judas tot sinen brueder Symon: "Trect mit my vechten tegen die Cananeen; op avontuer alst u geboert te vechten, dan sel ic mit u trecken." Doe toech Symon mede. Ende si vochten jegen die Cananeen ende Phereseen. Ende God gafse hem in haren handen ende si slogen int besit 10.000 mannen.

Ende die coninc Adonybesech die vloech vandaen. Ende sy vervolchden hem ende si slogen hem sijn handen ende sijn voeten of. Doe seide Adonybesech: "Ic sloech op een tijt 70 coningen haer handen ende haer voeten of. Ende si lagen onder mijn tafelen ende aten dat relief dat daerof quam. Also als ic dede, also heeft mi God nu wedergedaen." Doe togen die van Juda voir Jherusalem ende daer starf die coninc Adonybe\sech.

[fol. 92rb]

Doe bestreden die van Juda Jherusalem ende wonnent. Ende si verslogent al mit den swaerde. Ende die stede verbarnden si. Doe togen die van Juda ende vochten jegen die Cananeen die in dat gebercht wonende waren ende in dat slechte lant. Ende die verslogen si. Doe voeren die van Juda in Ebron ende wonnen daer Sysay, Achyman ende Tolmay. Doe togen si voir Dabir ende wonnen dat. Doe togen si voir Sephath ende wonnen dat ende verslogent al. Ende doe wonnen si Gasam, Ascolon ende Accaron ende al dat lant dat daertoe hoerde. Die in dat dal woenden, die en mochten die kinder van Ysrahel niet winnen, want si hadden snydende wagenen daer si haer lant mede bescutteden. Doe belagen si een stede, hiet Lusa. Doe sagen si daer een man uut comen. Doe seiden si tot hem: "Sect ons ende openbaert ons hoe wi die stede best mogen winnen. Wi sellen u ontfermherticheit bewisen ende doen u gracie." Die man wijsde hem wegen, sodat si die stede wonnen ende verslogent al dat in die stede was. Die man die hem wegen gewijst hadde, die lieten si vry gaen mit al sijn geslacht. Ende si togen int lant van Cetim ende tymmerden daer een stede ende noemden die Lusa.

[fol. 92va]

Doe saten die kinder van Ysrahel een wijl tijts mit rusten, sonder striden ende sonder vechten. Ende die van Benyamin die woenden in Jherusalem. Ende si lieten die Jebuseen onder hem wonen om tribuyt. Ende si en braken haer outaren niet ende si en verderfden haer afgoden niet, als hem God bevolen hadde. Ende desgelijc bleven die heidenen wonende onder die kinder van Ysrahel waer dat si wouden, om tribuyt. Ende si lieten hem haer heydensche wet houden.