Noordnederlandse Historiebijbel

24 capittel

Daerna doe vergaderde Josue alle die kinder van Ysrahel in Sychem ende riep alle die mogenste, rechteren ende princen van den lande tot hem.

Doe sprac hi tot den princen ende tot den gemeen volc ende seide: "Hoert, dit seit God van Ysrahel tot u: Int beghin doe woenden u vaderen over die vloet ende anbeden daer afgoden, als Thare, Abraham ende Nachors vader. Doe nam God Abraham, u vader, ende brocht hem uut Mesopothanien int lant van Canaan ende vermenichvoudichde sijn geslacht ende hadde enen soen, hiet Ysaac. Ende Ysaac wan Jacob ende Ezau. Ende Ezau gaf God dat gebercht van Seyr te bewonen. Ende Jacob mit sinen kinderen die toech in Egipten.

[fol. 90va]

Ende God die leden bi Moyses ende bi Aaron uut Egipten ende dede daer voel teykenen ende miraculen ende brochtse op dat Rode Meer. Doe riep gi an God. Doe settede God een duusternisse tusschen u ende die van Egipten ende lede u over dat Rode Meer. Ende God verdrencte daer voer uwen ogen alle die van Egipten: menschen, wagenen ende paerden. Ende God voede u lange in der woestinen. Ende doe vocht gi jegen die Amorreen. God gafse in uwen handen ende gi versloechtse ende besit nu haer lant. Doe quam Balach, die coninc van Moab, ende ontboet Balam, omdat hi u soude vermaledien. Ende God en woude hem niet horen, mer Hi verkeerde die woerden ende gebenedide u. Ende doe quaem gi over die Jordaen ende wont Jerico. Ende doe vocht gi jegen die Amorreen, Phereseen, Cananeen, Etheen, Gerseen, Eveen ende Jebuseen. Ende God gafse alle in uwen handen ende versloechtse ende verjaechdese uut haren lande. Ende gi besaet haer lant ende haer husen.

Daerom, ontsiet God ende dient Hem, ende siet dat gi geen afgoden an en beet mit dat volc dat onder u woent."

Doe seide dat gemeen volc: "Dat moet verre van ons wesen dat wi afgoden anbeden souden, want onse Here, onse God, heeft ons geleet uut Egipten, daer onse voervaderen eygen waren te die\nen.

[fol. 90vb]

Ende Hi heeft voel teykenen voir ons gedaen. Ende Hi hevet ons bewaert in al onsen wegen ende heeft ons gebrocht in dit lant. Daerom so willen wi Hem dienen, want Hi is onse Here, onse God."

Doe screef hem Josue al die wet Gods ende leidse in die tabarnakel Gods ende beval hem dat sise altoes souden gedencken ende ansien ende houden ende daerna leven. Ende doe liet Josue al dat volc thuysgaen.

Ende corts daerna doe bleef hi doot, doe hi out was 100 ende 10 jaer. Ende hi wort begraven bi den berch Effraym.

Doe namen die kinder van Ysrahel Josephs gebeent, dat si uut Egipten brochten, ende begrueven dat in Sychem bi Jacob, sinen vader.

Daerna regierde Calef die kinder van Ysrahel een corte tijt ende starf ende wort begraven bi Jherusalem. Ende daerna starf Eleazer, Aarons soen, ende wort begraven in Galaad. Doe wort Finees, Eleazarus soen, biscop na sinen vader. Ende doe Finees doot was, doe wort hi begraven in Galaad in sijn lant.

Explicit liber Josue.

Et sic est finis, sit laus et gloria Trinis.

Qui legit, emendat; scriptorem non reprehendat.

Scriptor scripsisset bene melius, si potuisset.

Hoc opus exegi, Cristo sit gloria Regi.