Noordnederlandse Historiebijbel

23 capittel

Doe die kinder van Ysrahel dat lant mit rusten beseten hadden ende Josue seer out was, doe riep Josue tot hem die meeste des volcs: die

[fol. 90ra]

hertogen, die princen ende die rechteren, ende seide tot hem: "Siet, ic ben seer out ende ic en sel niet lange hier bi u wesen. Daerom, gedenct wat God u ende uwen geslachten gedaen heeft. Ende denct hoe God voer u gevochten heeft ende heeft u nu dit lant gedeelt van dat oesteynde der aerden totter groter see, daer voel volcs in was. Ende God heeftse al verdreven ende gi besit dat lant. Daerom so weest sorchvoudich ende hout die wet also als Moyses bescreven heeft. Ende en weest niet geneicht ter rechterside of ter lufterside. Ende wacht u wel voer die heydenen die onder u wonen, dat gi haer goden niet en dient noch en anbeet. Mer anbeet uwen Heer, uwen God, als gi tot nu toe gedaen hebt, so sel God voir u vechten. Ende nyement en sel u mogen wederstaen, want een van uwen volc sel 1.000 van uwen vianden verjagen, want u Here, u God sel voir u vechten. Daerom so mint God naerstelic.

Ende wacht u wel dat gi geen vrientscap noch menderscap mit hem en hebt, noch mit den heydenen die mit u wonen. Ende weet datse God daerom niet verdreven en heeft van u, omdatse u wesen sellen een cuyl ende een stric in te vangen, ende een toetrecken tot sonden ende een staec in uwen ogen. Ende wort

[fol. 90rb]

gi dan verwonnen, so sel God dan sijn graci van u halen ende verstroeyen u van dat alrebeste lant dat Hi u gegeven heeft. Ende gedenct al dat u God beloeft heeft. Dat hevet Hi u gedaen ende daer en is niet een woert aftergebleven. Ende gelijc dat God overal vervolt hevet dat Hi geseit hevet int guede, also sel Hi oec vervollen dat Hi geseit hevet int quade, est dat gi die afgoden anbeet."