Noordnederlandse Historiebijbel

22 capittel

Ende in die tijt doe riep Josue dat geslacht van Ruben, van Gad ende half dat geslacht van Manasses ende seide tot hem: "Gi hebt al gedaen dat u Moyses bevolen hadde. Ende gi hebt mi onderdanich geweest. Ende gi hebt lange van uwen wiven ende van uwen kinderen geweest. God hevet uwen bruederen rust gegeven, als Hi hem geloeft hadde. Daerom, keert thuuswaert in dat lant dat u Moyses gegeven heeft over die Jordaen. Ende siet dat gi die wet Gods ende die geboden Gods wel hout, als u Moyses bescreven heeft, ende mint God uut al uwer herten ende uut al uwer sielen ende wandert in sinen wegen." Doe gebenedide hise. Ende si ghingen tot haren tabarnaculen. Ende doe namen si alle haer guet mit hem ende quamen op die Jordaen. Ende daer maecten si een outaer in die ere Gods ende dancten ende loefden God, dat si nu dat lant besitten souden dat hem God beloeft hadde.

Doe die kinder van Ysrahel vernamen in Sylo dat Rubens geslacht ende half dat geslacht van Manasses ende Gads geslacht een outaer gemaect hadden, doe meenden si dat

[fol. 89vb]

si afgoden anbeden. Ende si senden daer Finees, Eleazarus soen, ende 10 princen mit voel volcx. Doe seide Finees: "Waerom laet gi alle God van Ysrahel ende maect een vreemt outaer ende aenbedet afgoden? Weet gi niet dat Nachor alleen misdede jegen God ende voel van Ysrahel worden daerom geplaecht?"

Doe andwoerden Rubens, Gads ende half Manasses geslachten ende seiden: "Die alrestercste ende mogenste God van Ysrahel die kent dat ende weet dat, ende versta gijt dat wi dat outaer gemaect hebben in sijnre eren om Hem te dancken ende te loven van der gracien die Hi ons gedaen heeft. Dat moet verre van ons wesen dat wi den almachtigen God souden laten." Doe Finees ende die princen die woerden hoerden, dat behagede hem wel. Doe seide Finees tot hem: "Nu weten wi dat God mit u is." Ende alle die dat hoerden, die dancten ende loefden Gode van Ysrahel. Doe toech Finees mit sinen volc in Sylo. Ende die geslachten van Ruben, van Gad ende half Manasses geslacht die togen in dat lant dat hem Moyses gegeven hadde.