Noordnederlandse Historiebijbel


21 capittel Doe quamen die princen van Levijs geslacht tot Eleazer, den priester, ende tot Josue ende tot den hertogen ende den geslachten van Ysrahel. Ende si seiden tot hem allen: "God die sei\de
[Folio 89rb]
bi Moyses dat gi ons steden sout geven in te wonen ende buten den steden ons lant geven sout ons beesten op te weyden." Van Judas gheslacht, van Symeons geslacht ende van Benyamins geslacht hadden die levyten 13 steden in te wonen ende lant haer beesten op te weyden. Van Effrayms geslacht, van Dans geslacht ende van half Manasses geslacht hadden die levyten 10 steden; van Ysachars geslacht ende van Neptalims geslacht ende van Sabulons geslacht 13 steden; van Rubens geslacht, van Gads geslacht ende van half Manasses geslacht 12 steden. Ende tot allen steden so hadden die levyten dorpen ende lant haer beesten op te weyden. Ende der steden die die levyten onder hem allen hadden - ende in dat capittel bisonder genoemt staen - die wasser 48. Ende tot allen steden hadden si buten lant haer beesten in te weiden. Doe hadden die kinder van Ysrahel dat lant gewonnen dat God haer voervaderen geloeft hadde. Ende si besaten dat mit rusten. Ende daer en was nyement die hem dorst jegen hem versetten. Ende al dat hem God geloeft hadde, dat was hem
[Folio 89va]
geschiet. Ende daer en brac niet een woort an, ten was al voldaen.