Noordnederlandse Historiebijbel

18 capittel

Doe vergaderde Josue al dat volc van Ysrahel ende toech mit die tabarnakel ende mit dier arken in Sylo. Ende die bleef daer staende. Doe waren daer noch 7 geslachten die geen arf noch geen eygen lant en besaten. Daer seide Josue toe: "Hoe beit gi aldus lange dat gi geen erf en besit van dat u God gegeven heeft? Gaet ende kiest uut elc geslacht 3 mannen. Die sellen die groetheit van den geslacht bescriven ende doergaen dat lant ende besien dat ende delen dat na die voelheit des volcs in seven delen ende bescriven dat ende comen dan voer mi in Sylo, want Judas geslacht hadde dat lant suutwaerts van dat gebercht. Ende Josephs geslacht hadde dat lant noertwaerts van dat gebercht. Ende die levyten en sellen geen deel hebben gelijc die ander geslachten, mer God sel haer deel wesen. Ende Rubens geslacht ende Gads geslacht ende half dat geslacht van Manasses hebben haer deel lants over der Jordanen." Doe ghingen die mannen ende doersagen

[fol. 88vb]

dat volc ende dat lant ende bescreven dat ende deeldent in seven delen ende quamen daer mitten scrift voer Josue in Sylo.

Doe deelde Josue dat lant den seven geslachten van Ysrahel in 7 delen. Dat eerste loth viel Benyamins geslacht. Ende die hadden dat lant tusschen Judas geslacht ende Josephs geslacht. Ende si hadden in dat een lant 12 steden mit haer dorpen ende in dat ander lant 14 steden mit haren dorpen, als dat capittel die namen van der steden uutnoemt.