Noordnederlandse Historiebijbel

19 capittel

Dat ander loth dat viel Symeons geslacht. Ende si hadden in een lant 13 steden mit haren dorpen ende in een ander lant 4 steden mit haren dorpen daer dat capittel die namen of uutwijst.

Dat dorde loth dat viel Sabulons geslacht. Ende si hadden onder hem 12 steden mit haren dorpen.

Dat vierde loth had Ysachars geslacht. Ende si hadden onder hem 16 steden mit haren dorpen.

Dat vijfte loth dat viel Azers geslacht. Ende si hadden onder hem 22 steden mit haren dorpen.

Dat seste loth dat viel op Neptalims geslacht. Ende si hadden onder hem 19 steden ende dorpen.

Dat sevende loth hadde Dans geslacht. Ende si hadden onder hem 17 steden ende dorpen.

[fol. 89ra]

Ende dat geslacht van Dan die vochten tegen een lantscap ende hiet Lesen. Ende si verslogen dat volc mit den swaerde ende si besaten dat lant. Ende si noemdent Lezendan.

Doe dat lant gedeelt was, doe gaven die kinder van Ysrahel Josue een deel lants midden onder hem, daer hi om bat, int gebercht van Effraym. Ende daer tymmerde hi een stat daer hi in woende.

Also deelden Eleazer, den priester, ende Josue dat lant der kinderen van Ysrahel in Sylo voir die tabarnakel Gods, des Heren.