Noordnederlandse Historiebijbel

3 capittel

Doe stont Josue in der nacht op ende beval den levyten dat si die ar\ke

[fol. 83ra]

souden rede maken ende trecken daermede op der Jordanen. Die levyten deden also. Ende al dat volc volchden hem tot opter Jordanen. Ende daer lagen si drie dagen. Doe geboet Josue elc prince dat hi in sijn geslacht soude doen ropen: als die priesteren mit der arken reysden, dat dan al dat volc bereet soude wesen ende volgen der arken ende laten tusschen der arken ende den volc 16 stadien, opdat men die arke van verre mocht sien ende wat wech dat men hem volgen soude. Ende een ygelic soude hem wachten dat hi die arke niet te na en quaem. Doe seide Josue tot den volc: "Een ygelic maec hem heylich. Morgen so sel God wonder onder u doen." Ende doe seide hi tot den priesteren: "Gi selt die arke opheffen ende gaen daermede voer den volc."

Doe seide God tot Josue: "Huden sel Ic u beghinnen te verheffen onder die kinder van Ysrahel, opdat si weten mogen dat Ic mit u bin, als Ic mit Moyses was. Ende segt den priesteren die die arke dregen, dat si in die Jordaen gaen ende bliven daerin staen, waent al dat volc over is." Doe seide Josue tot den volc van Ysrahel: "Hoert alle harwaert ende verstaet die woerden Gods. Weet dat God midden onder u is. Ende Hi sel voer u aensicht verstroeyen die Cananeen, Etheen, Eveen, Phereseen, Gerseen, Yebuseen ende Amor\reen.

[fol. 83rb]

Ende als die arke in die Jordaen staet, so sellen die 12 mannen, uut elc geslacht een, nemen een steen uut den gront der Jordanen ende dregen die opt lant." Doe namen die priesteren die arke mit den leviten ende ghingen ter Jordanen. Ende doe si haer voeten staken in dat water der Jordanen, doe weec dat water wech ende ghinc staen rechtop, oft tusschen twee mueren gestaen hadde. Ende die priesteren ghingen in die Jordane staen mit drogen voeten. Ende al dat volc - mannen, kinderen, vrouwen - ende beesten die ghingen daerover mit drogen voeten.