Noordnederlandse Historiebijbel

4 capittel

Doe vercoes Josue 12 mannen ende geboet hem elc enen herden steen te halen uut den gront der Jordanen daer die arke gestaen hadde. Die 12 mannen deden also ende drogen elc enen steen op haren scueren ende leiden die opten cant van der Jordanen.

Ende doe ghinghen si ende rechten 12 stenen in den gront daer die arke gestaen hadde. Doe al dat volc over was, doe ghinc dat water der Jordanen weder staen alst eerst gestaen hadde. Ende opten tienden dach van der eerster maent, doe ghingen si over die Jordaen.

[fol. 83va]

Ende dat geslacht van Ruben ende van Gad ende half dat geslacht van Manasses die ghinghen al gewapent voer die kinder van Ysrahel, als si Moyses geloeft hadden. Ende dier wasser 40.000 vechters die streken voer op dat effen lant van Jherico.

Doe dede Josue die 12 stenen nemen ende maecten daer een outaer of in Galgala ende seide tot den kinderen van Ysrahel: "Als u u kinderen vragen: Wat beduden dese stenen? so sel gi seggen ende andwoerden: Die stenen staen daer tot enen gehogenisse dat God dat water dede sceiden, sodat die kinder mit drogen voeten doer die Jordaen ghingen, ghelijc datse God dede gaen doer dat Rode Meer mit drogen voeten. Daerom sel gi die moghende hant Gods altoes ontsien."