Noordnederlandse Historiebijbel

2 capittel

Doe sende Josue twee mannen heymelic om dat lant te besien ende seide: "Gaet ende besiet dat lant ende die stede Yerico ende wat wech wi dat best toegaen." Die twee mannen ghinghen ende besagen dat lant ende quamen in dier stede ter herberghe tot een gemeenwijf die woende binnen der poorten an der mueren van der steden ende was genoemt Raab ende staet int ewangelium genoemt van Onser Vrouwen Geboert. Ende si quamen daer bi avont in om die stede te besien. Ende dat wort den coninc van Yerico geseit dat daer verspiers in der steden gecomen waren. Doe sende die coninc

[fol. 82va]

mannen tot Raab, dat si haer gasten den coninc senden soude. Mer Raab die hadde die twee mannen op den solre verborgen onder vlas ende seide: "Si quamen hier openbaer tot mi, mer ic en wist niet van waen dat si waren. Tavont doe men die poert sloet, doe waren si recht uutgegaen. Daerom, vervolchtse vlus ende vanctse." Ende die mannen ghingen uut der poorten ende volchdense ter Jordanen toe. Ende doe die mannen uut waren, doe sloet men die poort toe.

Ende doe clam dat wijf Raab tot die twee mannen ende seide: "Ic kenne dat men u dit lant sel geven. Daerom sijn wi voir u vervaert, want wi hebben gehoert dat God dat Rode Meer verdroechde om uwen willen, doe gi uut Egipten quaemt, ende dat gi twee coningen verslegen hebt mit al haer volc. Ende daerom so sijn wi vervaert dat gi dit lant besitten selt, want u God die is God in den hemel daer boven ende in der aerden hier beneden. Daerom so sweert mi bi uwen Gode, also als ic u ontfermherticheit gedaen hebbe, dat gi mi also ontfermherticheit bewijst hier in mijns vaders huus ende geeft mi een waerachtich teyken dat gi mijn vader,

[fol. 82vb]

mijn moeder, mijn brueders ende mijn susteren ende alle die mit mi in den huse sijn, bescermt van der doot." Doe andwoerden die twee mannen ende seiden: "Wi sellen ons leven voir u setten, opdat gi ons niet en melt. Als ons God dit lant gift, so sellen wi uwer ontfermen in der waerheit." Doe liet dat wijf Raab die mannen tot enen veynster uut mit enen reep, want dat huys stont op die muer van der steden. Ende si seide tot den mannen: "Gaet int gebercht ende blijft daer drie dagen lanc leggen, totdat die mannen wedergecomen sijn die u soken, opdat si u niet en vangen, ende dan gaet uwen wech." Doe seiden die twee mannen: "Laet die reep in dat veynster hangen, opdat wi u huus mogen kennen ende bescermen al die daerin sijn, opdat wi onsen eet mogen houden."

Doe seide Raab: "Ic sel doen dat gi geseit hebt." Ende si bant den reep in dat veynster ende lyeten buten bliven ende hangen. Ende die mannen ghingen int gebercht also lange, dat die ander mannen in die stede waren. Doe ghingen si ter Jordanen waert ende ghingen tot Josue. Ende si vertelden Josue ende den gemeen volc wat hem gesciet was ende wat si Raab geloeft hadden.