Noordnederlandse Historiebijbel

19 capittel

Doe screef Moyses: "Als God die heidenen uut dat lant verdreven heeft ende gi dat beseten hebt, so sel gi al dat lant delen in drien delen. Ende in elc deel sel gi ordineren drie steden. Of yement enich dootslach dede, dat hi in enich van dien steden mach wiken ende ontgaen. Ende dit sel die wet wesen van die dootslagers die in dien steden wiken sellen ende haer leven houden, so wie onwetende sinen evenmensche dootslaet ende gisteren of eergisteren daer geen nijt op

[fol. 74ra]

en hadde. Mer si ghingen tesamen in den bosch om hout te houden ende mit dat hi hieu, so vloech dat yser van den steel ende quetste sinen vrient doot. Die man sel lopen tot een van die drie steden ende daer sijn lijf behouden, op avontueren of des mans magen die daer doot is, hem vervolchden ende dootslogen, eer hi in enich van den steden quaem, want hi en is der doot niet sculdich, omdat hi op sinen evenmensche geen haet en hadde. Ende ist sake dat God u lant vermeret dat Hi u gegeven heeft ende hout gi sijn geboden die ic huden openbaer ende bescrijf ende mint Hem alleen ende wandert in sinen wech, so sel gi in dat lant dat u God vermeret heeft, oec drie steden ordineren, opdat daer geen ontsculdige bloetstortinge en gescie in dat lant dat u God vermeret, opdat gi geen saken des bloets en sijt. Mer so wie sinen broeder haet ende hem lagen leit om te verslaen ende jegen hem opstaet ende ter doot brenct, ende wijct die mensche tot enich van die voirgenoemde steden, die rechters van dier steden die sellen die menschen vangen ende leveren in die handen der vrienden die daer doot is. Men en sel sijns niet ontfermen, mer men sel hem doden ende wreken die misdaet des bloets in Ysrahel.

Een mensche die den anderen opseit

[fol. 74rb]

enighe lelicheit of enighe sonden ende mer enen tuuch en hevet, die en mach hem niet deren. Mer twee of drier luden tuuch die sijn van waerden. Ende waert datter enich logenachtich tuuch opstonde jegen een mensche ende bescul dichde hem van enich misdaet, die sellen beide voer den priester of voer den rechter staen die dan sel wesen. Ende die rechter sel naerstelic dat ondersoken. Ende vint hi dat die wroger liecht ende valscheit seit over sinen evenmensche, so sel men die misdaet an hem rechten daer hi sinen evenmensche of wroechde. Ende dat recht sel men openbaer doen, opdat dat gemeen volc daer vrees voer hebben sal ende hem ontsien dat quaet te doen. Ende men sel die logenaers niet ontfermen, mer men sel dat lijf geven voer dat lijf, oech voer oech, tant voer tant, hant voer hant, voet voer voet. Also sel men dat recht volbrengen."