Noordnederlandse Historiebijbel

18 capittel

Doe screef Moyses: "Alle die priesteren ende levyten ende die van haer geslacht sijn, die en sellen geen deel noch geen erf besitten mit dat gemeen volc van Ysrahel, want die offerhande ende die sacrificien die men Gode doet, daer sellen si of leven. Ende si en sellen anders geen guet hebben onder haren bruederen, mer God sel haer erf ende haer loen wesen, als Hi geseit heeft. Dit is die priesteren recht van der offerhande. Weer si ossen of scapen offeren, dat sellen si den priesteren geven, ende alle welrukende cruden ende al dat men eten mach: die eerste

[fol. 73va]

vruchten van den coren, van den wijn, van den olyen, ende een deel van der wolle, die men van den scapen sceert, want God die heeft die levyten vercoren dat si in sinen dienst sellen wesen ende haer kinderen tot in der ewicheit. Est dat enich levijt gaet uut sijnre steden daer hi in woent ende begheert een ander stede daer men God in dient, aldaer sel hi den naem Gods anbeden ende dienen gelijc sijn ander brueders, die levyten. Ende hi sel sijn deel van der spisen ontfangen gelijc die anderen, mer uut die stat van sijn patrimonium daer sel hi uut verdreven wesen.

Ende als gi in dat lant coemt dat u God geven sel, so wacht u dat gi geen geselscap en hebt mit die heydenen. Ende laet u knechten noch u dochteren niet mit hem ommegaen. Ende scuwet diegene die beelden gieten of snyden. Ende wacht u voer die wigelaren, voer die tovenaren, voir diegene die die dromen beduden of die mit swarte consten ommegaen, ende voer waersagers die der luden leven ende doot willen weten. Alle dese dingen verbiet God. Daerom, verdrijftse van u ende weest volmaect sonder smetten voir uwen Heer, uwen God.

God sel u een propheet verwrecken van

[fol. 73vb]

uwen volc ende van uwen broederen; dien sel gi horen, want dat heb gi van God gebeden in den berch Oreb, daer gi alle vergadert waert ende seit: Laet ons die grote stemme Gods niet meer horen uut den vuer, opdat wi niet en sterven. Doe seide God tot mi: Si hebben alle wel geseit: Ic sel hem een propheet verwrecken midden onder hem van haren bruederen, gelijc dat gi sijt. Ende Ic sel mijn woerden in sinen mont setten. Ende hi sel tot den volc spreken al dat hem God gebiet. Ende so wie sijn woerden niet horen en wil die hi spreken sel in minen naem, dat sel Ic spreken. Mer die propheet die hovaerdelic verargen wil in minen naem die woerden die Ic niet geboden en hebbe te spreken, of in minen naem van vreemden goden predict, die sel men doden."