Noordnederlandse Historiebijbel

17 capittel

Doe seide Moyses: "Gi en selt uwen Heer, uwen God, geen ossen noch geen scapen offeren die enich smitten hebben of die enich gebrec hebben. Ende als u God gescict heeft in enich stede rechter te wesen, ende wort daer man of wijf voer u ghebrocht die quaet gedaen heeft int openbaer: dat hi afgoden geeert heeft ende angebeet, als die sonne, of die maen, of yet dat an den hemel is, als God verboden heeft, ende wort u dat geboetscapt, so vraecht daer naerstelic na ende verstaet die waerheit oft van die kinder van Ysrahel is gesciet. Ende wort hem dat mit twee of mit drie menschen overgetuucht, so sel hi daerom sterven. Mer daer mer een tuuch en is, sel men nyement om doden. Ende man of wijf die die sonden gedaen heeft, die sel men uut der stede leden ende mit stenen dootworpen ende bedecken daermede. Ende den eersten tuuch die

[fol. 73ra]

sel den eersten steen worpen, ende daerna sel dat gemeen volc die mensche bedecken mit stenen ende also dat quaet wreken onder die kinder van Ysrahel.

Ende ist datter een swaer saec voir u gerecht comt die twivelachtich is, so sel gi beide die personen ansien ende gi selt haer beider saken horen: een malaets mensche ende geen malaets mensche. Ende dan, siet dat recht van uwer steden over. Is die sake dan vreemde ende en vint gise in u gerecht niet, so staet op ende gaet ter steden die God vercoren heeft, tot den priester ende tot den levyten die dan rechter is, ende vraecht hem onderscheit van die saec. Die sel dat oerdel geven na die rechte waerheit. Ende doet na dat u die priester wijst, die God in sijnre steden vercoren heeft: die sel u leren na die wet Gods. Daerom so soect sijn wijsheit ende en neicht u niet totter rechterside noch totter lufterside. Ende die dan hovaerdich is ende en wil den priester niet onderdanich wesen die op die tijt dient uwen Heer, uwen God, ende heymeliken oerdelt, die mensche sel sterven om dat quaet dat hi doet onder die kinder van Ysrahel. Ende als dat gemeen volc dat hoert, so sellen si hem ontsien. Ende nyement en sel hem dorren verhovaerdigen.

Ende die rechter en sel niet meer wiven hebben dan

[fol. 73rb]

hem geoerloft is. Ende als yement tot enen rechter gecoren wort ende in sijnre machten is, die sel doen scriven dat boec van der wet Gods, Deutronomium, ende ontfangen dat tot enen exempel van den priester van Levijs geslacht. Ende dien boec sel hi bi hem houden ende lesen die alle dage over, ende leren Gode ontsien ende houden sijn geboden ende sijn wet, ende verheffen u hert niet in hovaerdien over u bruederen, noch neygen niet an die rechterside noch an die lufterside, opdat gi lange regieren moecht ende u kinderen na u."