Noordnederlandse Historiebijbel


16 capittel Doe seide Moyses: "Bewaert die eerste maent in die lenten ende hout dan Paeschen, want in die maent doe lede u God uut Egypten. Daerom sel gi hoechtijt houden seven dagen lanc ende eten dat paeschlam ende doen Gode sacrifici. Ende gi en selt Gode die sacrifici niet doen in allen steden daer gi woent, mer in een stede die God verkiest, daer sel men sinen naem anbeden ende offeren ende sacrificie doen, ende daer die hoechtijt vieren seven dagen lanc. Ende driewerven binnen den jaer so sellen alle mannen comen ter hoechtijt in die stede die God vercoren heeft ende Hem daer anbeden ende 7 dagen daer vieren ende daer sacrifici doen. Dat eerste is die hoechtijt van Paeschen. Dat ander is in den oest, als die vruchten ingedaen sijn. Dat dorde is doe die tabarnakel gewijt wort. Ende nyemant en come mit ydelre hant voer gode ten outaer, mer een ygelic sel offeren na dat hem God verleent heeft. Ende alle die rechteren die geset sijn te rechten
[Folio 72vb]
in allen steden van den lande, die sellen rechtvaerdelic rechten: noch tot geenre siden geneicht wesen, noch van nyement geen gelt nemen noch giften, want die ghiften verblinden die ogen der wiser menschen ende verkeren die woerden der rechtvaerdiger menschen. Daerom sellen die rechters dat recht volgen, opdat si lange in gesontheit moghen leven. Ende en hebt geen goden, want dat haet God."