Noordnederlandse Historiebijbel

21 capittel

Doe vernam Arad, die coninc van Cananeen, dat die kinder van Ysrahel verspiers doer dat lant senden. Doe vergaderde hi sijn volc ende street jegen die kinder van Ysrahel ende wan hem een roef of. Doe baden die kinder van Ysrahel an God ende loefden: Waert dat si den coninc van Canaan verwonnen, so souden si al sijn steden verbarnen ende tenietmaken. God die hoerde haer gebet. Ende si verwonnen den coninc van Cananeen. Ende si maecten sijn steden teniet.

Doe toech Moyses mit den volc van den berch Hor ende quamen weder bi dat Rode Meer. Doe begonde dat volc den wech ende den arbeit te verdrieten ende seiden jegen God ende jegen Moyses: "Waerom hebbe gi ons uut Egipten geleet ende wi sellen hier sterven in der woestinen? Hier en is geen broet te eten noch geen water te drincken. Ende onse siel walcht van desen lichte spise." Ende om dier woerden willen so sende God onder hem vuerige serpenten. Ende daer wort voel volcs geplaecht ende gedoot. Ende doe quam daer voel volcs tot Moyses ende seiden: "Wi hebben gesondicht. Wi hebben jegen God gesproken ende jegen u. Bid voer ons, dat God dese serpenten van ons neme." Doe

[fol. 63vb]

bat Moyses voir dat volc. Ende doe seide God tot Moyses: "Maect een metalen serpent ende set dat op een staec tot enen teyken. So wie gequetset is van die vuerige serpenten ende dat serpent ansiet, die sel gesont worden." Moyses dede alsoe ende rechte dat serpent voir den middach. Ende alle die dat serpent ansagen, die worden gesont van horen quetsinge.

Figuer: Dat was die figuer van dat Jhesus voir den middach, als te sextijt, opgerecht wort an den cruce op den Gueden Vridach. Ende alle diegene die sijnre pinen gedencken ende an God genade begeren, die sellen gesont worden an der sielen.

Doe dwaelde Moyses mit sijn volc in die woestijn ende quamen te Salmana. Van Salmana quamen si op die rivier Arnon. Ende daer ghingen die kinder van Ysrahel over mit drogen voeten, gelijc dat si over dat Rode Meer ghingen, ende quamen doe in dat conincrijc van Moab.

Doe seinde Moyses boden an Zeon, den coninc van Amorreen, ende bat hem of hi doer sijn lant reysen most. Hi en soude doir sijn ackeren, noch doer sinen wijngaert niet reysen, noch uut sinen putten niet drincken. Ende die coninc Zeon en woudet hem niet gehenghen. Mer hi vergaderde sijn volc ende toech tegen die kinder van Ysrahel te stride. Ende Moyses mit sinen volc die verslogen den koninc Zeon mit al sinen volc ende

[fol. 64ra]

si besaten sijn steden ende sijn lant van Amorreen.

Doe sende Moyses voerlopers in dat lant van Basan ende haelden daer enen roef. Doe dat die coninc Og van Basan vernam, doe vergaderde hi sijn volc ende woude jegen die kinder van Ysrahel striden.

Doe seide God tot Moyses: "Ontsiet Og, den coninc van Basan, niet, want Ic sellen geven in uwen handen. Ende gi selt hem verslaen, als gi Zeon, den coninc, deet." Doe street Moyses jegen Og, den coninc van Basan, ende versloech hem mit al sijn volc. Ende Moyses mit sijn volc besat sijn lant ende sijn steden.