Noordnederlandse Historiebijbel

13 capittel

Doe toech dat gemeen volc van Azeroth in die woestijn Pharan. Daer setteden si die tabarnakel mit die arke ende toefden daer.

Doe seide God tot Moyses: "Sent 12 mannen van die 12 geslachten van Ysrahel, die dat lant besien sellen van Canaan, dat Ic den kinder van Ysrahel geven sel." Moy\ses

[fol. 59vb]

dede als hem God beval. Hi nam van Rubens geslacht een, genoemt Seminua; van Symeons geslacht een, genoemt Saphat; van Judas geslacht een, ghenoemt Calef; van Ysachars geslacht een, genoemt Ygal; van Effrayms geslacht een, genoemt Josue; van Benyamins geslacht een, genoemt Falti; van Sabulons geslacht een, genoemt Geddyel; van Josephs geslacht een, genoemt Septri; van Manasses geslacht een, genoemt Gaddi; van Dans geslacht Ammihel; van Azers geslacht Mychael; van Neptalims geslacht Naabbi; van Gads geslacht Guel. Dit sijn die namen van die mannen, die Moyses sende in dat lant van Canaan om dat lant ende dat volc te besien. Doe seide Moyses: "Gaet ende besiet dat lant ende wat volc dattet is, die daerin wonen, of si sterc of cranc sijn, ende of dat lant guet of quaet is, ende of die steden bemuert sijn of onbemuert. Ende besiet, of daer enich vruchten in wassen. Ende als gi wedercoemt, so brenct van die vruchten mit u." Ende het was in die tijt dat die druven rijp waren.

Doe ghinghen die 12 mannen om dat lant te besien ende quamen in Ebron ende sagen daer Achims geslacht. Ende dat waren grote ruesen; die ontsagen si seer. Ende die steden

[fol. 60ra]

waren groet ende starc ende wel bemuert. Ende dat lant was vol van allen vruchten. Ende si waren in dat lant en besagent 40 dagen lanc. Josue ende Calef die sneden een druve van enen wijngaert ende hingen die an een grendel op haer scueren ende brochten die also dregen voer Moyses. Die ander brochten appelen van gernaten ende vigen ende ander vruchten. Ende si quamen voir Moyses ende voir al dat ander volc, ende openbaerden hem die vruchten ende seiden: "Wi hebben dat lant gesien. Het is een vol lant: daer vloeyt melc ende honich. Ende siet, aldusdanighe vruchten wassen aldaer. Mer het is een sterc volc. Ende het sijn grote stercke steden ende vast bemuert. Ende wi hebben Achims geslacht gesien; dat sijn grote stercke roesen. Ende wi sagen dat lant daer Amelech woende. Eveen, Etheen, Yebuseen, Amorreen ende Cananeen die wonen op die vloet van die Jordaen. Ende si sijn seer sterc." Doe seide Calef ende Josue jegen haer murmuraci ende seiden: "Laet ons int lant trecken ende dat besitten. Wy sellen dat volc wel verjagen." Die ander 10, die mit Calef ende Josue int lant geweest hadden, die seiden: "In geenre wijs en willen wi daer int lant, want dat volc is seer stercker dan wi sijn, want wi sagen daer ruesen also groet boven ons, als wi sijn boven sprinchanen."