Noordnederlandse Historiebijbel


12 capittel Maria ende Aaron, haer brueder, die murmureerden jegens Moyses om sijns wijfs willen ende seiden: "Waerom spreect God alleen mit Moyses ende en spreect niet mit ons?" Doe God dat hoerde, doe was Hi toornich. Ende Moyses was die saftmoedichste man die in der werelt was. Doe seide God tot
[Folio 59va]
Moyses, tot Aaron ende tot Maria: "Gaet gi drie tot den tabarnakel." Ende doe si daer waren, doe sprac God uut die calumpne des swercs tot Aaron ende tot Maria ende seide: "Wat propheet heeft tot u geweest, of wat visioen is u gheopenbaert in uwen slaep, dat gi op minen knecht Moyses murmureert? Ende hi is in alle minen huse die alregetroutste. Ic spreke jegen hem openbaer, mont jegen mont. Waerom en ontsie gi u niet op hem te murmureren?" Ende in dien toorn sciet God van hem. Ende Maria wort geplaecht mit een witte malaetscheit. Doe Aaron dat sach, doe seide hi tot Moyses: "Here, ic bidde u: Bidt voer mi dat mi God die sonde vergeve." Doe bat Moyses voer Aaron ende voir Maria, sijn suster, om gesontheit. Doe seide God: "Set Maria seven dagen uut al den volc. Ende laet dat gemeen volc hier also lange rusten." Ende na seven dagen wort Maria gesont.