Noordnederlandse Historiebijbel

Vijf capittel

God seide tot Moyses: "Gebiet den kinderen van Ysrahel dat si uut haren woninge ende uut haren geselscap verdriven ende setten alle, die lazarus sijn of besmit sijn. Man ende wijf, laetse onder u niet wanderen." Die kinderen van Ysrahel deden, als hem God beval.

God seide tot Moyses: "Sect den kinderen van Ysrahel: Man of wijf die sonden doet tegen dat gebot Gods uut vermetelheit ende comt weder ende beliet sijn sonden, die sel voer den priester comen ende offeren ende doen daervoer, als die wet uutwijst."

God seide tot Moyses: "Sect den kinderen van Ysrahel: So wat man sijn wijf ontloept ende slaept bi enen anderen man - hi vermoetet, mer hi en canse niet begripen noch betugen - wil die man die waerheit weten, so sel hi sijn wijf leden voer den priester ende offeren alsulke gaven, als daer gescreven staet. Ende die priester sel doen, als God dat ordineerde, ende geven haer drin\ken

[fol. 57va]

van dat water des outaers. Heeft si scult, daer sel een teyken an haer lichaem openbaren. Ende heeft si geen scult, si sel onbesmit bliven, als in die wet van zelotipie staet. Selotipia est invidia, suspicio contra uxorem."