6 capittel
God seide tot Moyses: "Sect den kinderen van Ysrahel: Een man of een wijf die loften loeft om Gode te dienen, dat hi geen wijn drincken en sel, noch genen dranc daer men droncken of drinken mach, die en sel gheen wijnazijn besigen, noch druven eten, noch niet dat van druven comt, also lange als hi ofgesceiden is. Ende die priester sel hem consacreren ende heiligen. Ende daerna en sel geen sceermes op sijn hoeft comen, noch tot genen doden gaen, als dat capittel uutwijst. Ende of si die loft braken, wat men hem dan doen soude."
God seide tot Moyses: "Sect Aaron ende sijn kinderen: Aldus sellen si die kinderen van Ysrahel gebenedien. God, die Heer, die gebenedie u ende Hi beware u ende toen u sijn aensicht ende ontferm uwer. God die keer sijn aensicht tot u ende geve u vrede. Ropen si also minen naem an over die kinder van Ysrahel, so sel Icse gebenedien."
Auteursrechtelijk beschermd