Noordnederlandse Historiebijbel

3 capittel

Dit is dat geslacht van Aaron ende van Moyses. Ende dit sijn die namen van Aarons kinderen: die eerste hiet Nadap, die ander hiet Abyu, die dorde hiet Elyazer, die vierde hiet Ythamer. Nadap ende Abyu die bleven doot, omdat si mit vreemt vuer God sacrifici deden ende lieten geen kinder. Ende Eleazer ende Ythamer die worden papen gewiet.

Doe seide God: "Dat geslacht van Levy sel dienen in die tabarnakel voir Aaron ende daer alle dingen bewaren. Ende waert dat daer een ander, vreemde diende, die soude sterven."

Doe seide God tot Moyses: "Tellet dat geslacht van Levy, alle mannepersonen van enen maent

[fol. 57ra]

ende daerboven." Moyses ende Aaron deden dat ende dat getal was 22.000. Doe seide God: "Dat geslacht van Levy sel Mi geheilicht wesen in minen dienst. Mer so wie daer vreemde toecomt, die sel doot bliven."

Doe seide God: "Telt alle die eerste geboren kinder van Ysrahel van een maent ende daerboven." Moyses ende Aaron deden also. Ende dier kinderen was 22.000, 200 ende 73. Ende die worden al God geoffert ende God geboot dat men die 200 ende die 73 lossen soude mit penninghen, als dat capittel uutwijst.