Noordnederlandse Historiebijbel

2 capittel

Doe seide God tot Moyses: "En telt Levijs geslacht niet mit die kinder van Ysrahel. Mer si sellen die tabarnakel bewaren ende die vaten ende die ornamenten ende al dat tot der tabarnakel hoert." Ende si waren om den ommeganc van den tabarnakel ende bewaerden die. Ende als die kinder van Ysrahel vertogen of verreysden, so en most nyement sijn hant an die tabarnakel steken op sijn lijf. Ende al dat in die tabarnakel was in Sancta sanctorum, dat bedecten die papen, als men reysde, soe\dat

[fol. 56va]

nyement bloet en sach. Want, so wie dattet bloet sach, anders dan die van Levijs geslacht toegewijt waren, die bleven doot. Ende buten om die rincmuer van die tabarnakel daer lagen die kinder van Ysrahel mit haren tenten ende paulyoenen.

An dat oesteynde van die tabarnakel daer lagen 3 geslachten: van Judas, van Ysacher ende van Sabulon. Van Judas geslacht was een prince, hiet Naason. Van Ysachars geslacht was een prince ende hiet Nathanael. Van Sabulons geslacht was een prince, hiet Elyab. Ende dese drie geslachten die hadden tesamen weerachtiger mannen 100.000, 86.000 ende 400.

An die suutside van die tabarnakel daer lagen in 3 geslachten: van Ruben, van Symeon ende van Gad. Van Rubens geslacht was een prince, een hiet Elysur. Van Symeons geslacht was een prince ende hiet Salamiel. Van Gads geslacht was een prince, hiet Elysaphat. Ende in haer scaren waren 100.000, 51.000, 400 ende 50 mannen.

An dat westeynde van den tabarnakel daer lagen drie geslachten, als Effraym, Manasses was Josephs soen - ende Benyamin. Van Effrayms geslacht was een prince, hiet Elysama. Van Manasses geslacht was een prince, hiet

[fol. 56vb]

Gamaliel. Van Benyamins gheslacht was een prince, een hiet Abydan. Ende in haren scaren waren 100.000, 8.000 ende een 100.

An die noertside van die tabarnakel daer laghen drie geslachten, als Dan, Neptalim ende Azer. Van Dans geslacht was een prince, een hiet Ahyeser. Van Neptalims geslacht was een prince, een hiet Ahyra. Van Azers geslacht was een prince, hiet Pegyel. Ende in haren scaren waren 100.000, 57.000 ende 600. Ende die somme van al was 600.000, 3.000, 500 ende 50 mannen. Mer Levijs geslacht en was onder hem niet getelt.

Also lagen die kinder van Ysrahel om die tabarnakel mit tenten ende mit paulioenen, recht oft een grote stede geweest hadde.