Noordnederlandse Historiebijbel

[fol. 56ra]

Hier beghint dat vierde boec, Numeri

Dat eerste capittel

God sprac tot Moyses in der woestinen van Synay uut die tabarnakel des vreden op den eersten dach van die ander maent in dat ander jaer, nadat si uut Egipten ghinghen ende seide: "Tellet alle die kinder van Ysrahel, elc in sijn geslacht, alle die manpersonen die boven 20 jaeren sijn ende sterc genoech sijn te striden. Ende neemter uut elc geslacht een die u mach helpen tellen. Ende Ic selse u nomen: uut Rubens geslacht neemt Elysur, uut Symeons geslacht Salamiel, uut Judas geslacht Naason, uut Ysachars geslacht Nathanael, uut Sabulon Elyab, uut Effraem Elysama, uut Manasses Gamaliel, uut Benyamin Abydan, uut Dan Elyezer, uut Azer Phegiel, uut Gad Elyzaphat, uut Neptalim Ahyra. Dat sellen 12 edel princen wesen over haer geslachten." Moyses ende Aaron die namen die princen eendrachtelic uut haren geslachten.

Opten eersten dach van der ander maent doe telde Moy\ses

[fol. 56rb]

in der woestinen van Rubens geslacht boven 20 jaren 46.000 ende 500, van Symeons geslacht 59.000 ende 300, van Judas geslacht 74.000 ende 600, van Gads geslacht 45.000 ende 600 ende 50, van Ysachars geslacht 54.000 ende 400, van Sabulons geslacht 57.000 ende 400, van Josephs geslacht 41.000 ende 500, van Manasses, Josephs ander soen, 32.000 ende 200, van Benyamins geslacht 35.000 ende 400, van Dans geslacht 62.000 ende 700, van Azers geslacht 41.000 ende 500, van Neptalims geslacht 53.000 ende 400. Dat sijn die kinder van Ysrahel, die daer getelt waren van Moyses ende van Aaron ende van die 12 princen, ende der weerachtiger mannen die waren 600.000, 3.000, 500 ende 50 mannen.

Ende Levijs geslacht en was niet getelt.