Noordnederlandse Historiebijbel

26 capittel

Voert seide God: "Maect gheen afgoden noch geen beelden, noch en recht geen teykenen van steen onder u die gi anbeet, want Ic ben u Heer, u God.

Ist, dat gi in minen geboden wandert ende die bewaert ende doet, Ic sel u tidich regen geven. Ende u lant, u bomen sellen mit vruchten vervolt worden. Ende gi selt gesaet ende gevoet worden. Ende

[fol. 55ra]

sonder vresen sel gi dat lant besitten. Ende onder u sel vrede wesen. Gi selt slapen ende daer en sel nyement wesen die u vervaren sel. Ic sel u vianden vervolgen ende voer u verjagen. Vijf van u sel 100 van u vianden verjagen. Ende 100 van u selre 1000 verjagen. Ende u vianden die sellen voer u aensicht verslegen worden. Ende gi selt wassen ende menichvoudigen. Ic sel onder u wanderen. Ende Ic sel u God wesen. Ende gi selt mijn volc wesen, want Ic hebbe u geleet uut Egipten.

Mer ist dat gi Mi niet en hoert ende mijn wet versmeet ende niet en hout, so sel Ic u haestelic visiteren mit armoede. Ende die hetten sellen u ogen versticken. Ende tevergeefs sel gi saeyen, want van u vianden selt verderft worden. Ende ist dat gi Mi noch niet gehoersaem en sijt, Ic sel u sevenvout plagen om uwer sonden wil. Ende in uwer hovaerdien ende in uwer herdicheit so sel Ic u geven enen yseren hemel ende een coperen aerde. Ende daer en sel niet op groeyen; noch u bomen en sellen geen vruchten dragen. Ende ist dat gi nochtan jegen Mi verkeerdelic andwoert ende wilt mijn geboden niet horen, so sel Ic beesten in uwen acker senden, die u beesten verslinden sellen. Ende en wil gi dan noch geen pe\nitencie

[fol. 55rb]

doen ende u selven castien, mer wandert gi verkeerdelic jegen Mi, so sel Ic u sevenwerven doen verslaen om uwer sonden willen. Ende Ic sel op u senden dat swaert mijnre wraken. Ende wijc gi in die steden, Ic sel pestilencie ende sterften onder u seinden ende leveren u onder u vianden handen. Ende daerna sel Ic u broet breken ende tenietmaken, also dat tien wiven tesamen sellen broet backen in enen oven ende leveren dat bi gewichten. Ende dat sellen si eten ende niet gesaet worden. Ende ist dat gi Mi noch niet en hoert ende mijn geboden niet en hout, so sel Ic in minen toren corregieren mit seven plagen om uwer sonden willen, also dat gi dat vleis uwer kinder selt eten. Ic sel u hoech getymmert breken ende destrueren ende u beelden tenietmaken. Ende Ic sel u verstroeyen onder die heidenen. Ende u lant dat sel woest worden. Ende u steden sellen verstoert worden." Dese plagen ende voel meer plagen seide hem God tevoren, dat hem gescien soude, waert dat si sijn geboden niet en hielden, also als dat capittel voert uutwijst.