Noordnederlandse Historiebijbel

24 capittel

Doe seide God tot Moyses: "Gebiet den kinderen van Ysrahel dat si u oly van olyven brengen om die tabarnakel te verlichten. Ende dat sel Aaron regieren, als die wet uutwijst."

Ende siet, daer was een wijf van Ysrahel die hadde een soen bi enen man van Egipten. Ende si woenden onder die kinder van Ysrahel. Die knecht blasphemeerde den naem Gods ende vermalediden. Doe wort hi gevangen ende voir Moyses gebrocht. Sijn moeder hiet Salumyt, Dabrijs dochter, van Dans geslacht. Men sloet den knecht in een kercker, also lange dat God openbaerde, wat men hem doen soude. God die seide tot Moyses: "Leet die knecht uut den volc. Ende alle die hoerden dat hi blasphemeerde, tot enen getuge der waerheit so sellen

[fol. 54va]

si haer hant op sijn hoeft leggen. Ende dan sel hem dat ghemeen volc stenen. Ende segt den volc van Ysrahel: So wie God vermaledijt of den naem Gods blasphemeert, die sel men stenen ter doot, weer hi van binnen is, dan van buten. So wie een mensche doot, die sel men weder doden. So wie een wont, die sel men weder wonden, als die wet uutwijst."