Noordnederlandse Historiebijbel

23 capittel

God seide tot Moyses: "Segt die kinder van Ysrahel die dagen die daer geheilicht sijn. Ses dagen sellen si wercken; opten sevenden dach sellen si rusten van allen werken, want dien dach is heilich. Op den 14sten dach van der eerster maent des avonts beghint Passcha.

[fol. 54rb]

Ende opten 15den dach van dier maent so ist groet hoechtijt; dan sel men vieren seven dagen lanc ende doen als die wet inhout.

Die ander hoechtijt is, als dat coren gesaeit is.

Ende die dorde hoechtijt is, als dat coren ingedaen is. Den eersten dach van die sevende maent sel gi vieren ende geenrehande werc doen. Ende die tiende dach van der selver maent sel gi feestelic vieren, seven dagen lanc, ende doen voert als die wet uutwijst."