20 capittel
God seide tot Moyses: "Sect den kinderen van Ysrahel: `Waer yement van den kinderen van Ysrahel ende oec die van buten onder hem woenden ende afgoden ende molochen onder hem brochten, die soud men doden. Bewaert mijn geboden ende doetse. Ic ben u Heer, u God, die u gheheilicht hevet. Soe wie sijn vader of sijn moeder vloect of onwaerdelic toespreect, die sel men doden. Soe wie slapet bi eens ander mans wijf, die sel men beide doden. Soe wie bi sijn stiefmoeder slaept ende openbaert die oneer sijns vaders, die sel men doden. Es man bi man of wijf bi wijf, die sel men beide doden. So wie slaept bi sijns soens wijf, die sel men doden. So wie een wijf heeft ende daerover bi sijns wijfs moeder is, die sel men levende barnen. So wie mit beesten is, die sel men doden. So wie slaept bi enen wive in haer maenstont ende die lelicheit openbaert, die sel men beide doden. Ende voert sel men doen, als die wet inhout."
Auteursrechtelijk beschermd