Noordnederlandse Historiebijbel

21 capittel

Doe seide God tot Moyses: "Segt tot Aaron ende tot den priesteren dat si hem niet en bevlecken in yements doot. Laetse voir Gode sacrifici doen, wantse heilich sijn. Laetse een maecht nemen tot enen wive, geen weduwe, noch die besmit of on\reyn

[fol. 54ra]

is ende geen meenwive. Mer hi sel nemen een maget van sijn geslacht."

Doe seide God tot Moyses: "Segt Aaron: So wat mensche die smetten heeft, die en sel hi niet wien tot den dienste Gods te doen als priester, als die scelu sijn of manc, of hincken, of cleyn of groet of cromme nosen hebben, of die vermeincte voeten of handen hebben, of bulen of sepelogen hebben, of worten an haren lichaem hebben. Die enige smetten hebben van Aarons geslacht, die en sel men geen priester wien." Moyses seide dit al tot Aaron ende noch voel meer, als hem God bevolen hadde.