Noordnederlandse Historiebijbel

19 capittel

God seide tot Moyses: "Segt alle den kinderen van Ysrahel: Ist, dat si mijn geboden houden, so sijn si heilich, want Ic heilich bin, u Here, u God. Een ygelic sel sijn vader ende sijn moeder ontsien. Mijn heilichdagen die sel gi bewaren. Aenbeet geen beelden, noch afgoden. Doet geen diefte. Ende lieget niet, verscalct noch en bedrieget uwen evenmensche niet. Sweert niet bi minen naem: Ic ben u Here, u God. Doet uwen evenmensche geen onrecht noch en verdructs niet. Laet dat loen van uwen wercluden niet onder u vernachten. Den doven en sel gi niet vloken noch scimpelic toespreken. Ende voir die blinde en set niet daer si hem an stoten mogen. Mer gi selt Mi ontsien. Doet rechtvaerdicheit uwen evenmenschen. Ende in den recht en sel gi geen personen ansien. Doet den armen

[fol. 53va]

ende den riken gelijc recht. Begheert geen bloetstortinghe uwes evenmenschen. Haet uwen brueder niet in uwer herten, mer beruspt hem van sijnre quaetheit. Weest geen scamper, noch ruunre, noch en murmureert niet. Gheert geen wraec. Ghedenct geen onrecht, dat u van uwen medebrueder gedaen wort. Mint uwen vrient gelijc uselven. Laet u beesten mit geen ongelijc gade spelen. Saeyt geen tweerhande saet in enen acker. Doet geen cleder an die van tweerhande vorwen sijn. Eet geen vleis mit den bloede. Doet geen wigelinge. Geloeft geen droem. Noch en laet u haer niet ronden noch uwen baert scheren. Laet u dochter gheen meenwijf wesen, opdat si die aerde niet en besmit ende dat van haer geen dootslach en comt noch en geschiet. Mijn sabaoth sel gi bewaren ende mijn sanctuarium sel gi ontsien. Gaet niet totten gokelaers noch totten wigelaers. Oude personen sel gi eren ende ontsiet God, uwen Heer. Wilt geen onrecht doen in scriven, in wegen of yn meten. Ju wagen sel rechtvaerdich wesen ende gelijc. Ju maten sellen rechtvaerdich wesen ende gelijc. Hout alle mine geboden ende weest rechtvaer\dich.

[fol. 53vb]

Ic ben u Heer, u God ende u bescermer."