Noordnederlandse Historiebijbel

35 capittel

Eerst so seide Moyses dat si ses dagen wercken souden. Ende op den sevenden dach souden si rusten, want dien dach is heilich. So wie op dien dach werc dede, die sout men doden. Ende men soude op dien dach in al haren husen geen vier barnen. Voert seide hi hem die ander geboden.

Doe seide hi voert tot al die scaren van dien volc: "Dit gebiet u God: Gi sult alle willichlic bereit wesen Gode te offeren gout, sulver, coper, jacinct, purpur, coccum bistinctum, bissus, geytenhaer, scaepsvellen, hout van cethim ende olij ende alle welrukende cruden ende mede alle edele gesteenten. Ende alle diegene die wijs ende abel van synnen sijn, die sel\len

[fol. 50rb]

comen ende helpen dat werc maken, als God geboden heeft." Doe quam al dat gemeen volc ende offerden haer gouden juwelen ende syden lakenen, die si uut Egypten brochten. Ende die princen offerden duerbaer ghesteenten ende costelike cruden. Aldus quamen alle mannen ende vrouwen ende brochten mildelic haer gaven om dat werc te volmaken.

Doe seide Moyses tot den kinderen van Ysrahel: "Siet, God heeft twee mannen vercoren dat werc te volmaken. Daer heeft Hi den geest Gods in gesent. Die een hiet Bezelehel ende is van Judas geslacht. Die ander hiet Calyab ende is van Dans gheslacht. Die twee sellen meesters van den werc wesen."