Noordnederlandse Historiebijbel


6 capittel Bezelehel ende Caliab die ontboden wise, verstandel mannen, als smeden, tymmerluden, berduerwerckers ende ander consten om dat werc te helpen volmaken. Doe leverde Moyses den wercluden dat gout, dat sulver, die syden lakenen ende die ander juwelen. Ende doe si begonden te wercken, doe brocht dat gemeen volc tot den wercluden alsoe voel juwelen, sodat si tot Moyses seiden: "Dit volc offert hier meer juwelen dan hier noet is tot den werc." Doe seinde Moyses enen man.
[Folio 50va]
Die riep onder den volc, dat nyement, man of wijf, meer offeren en soude totter tabarnakel. Ende doe lieten si of van die gaven te offeren. Doe volmaecten die wercluden die tabarnakel ende dat daertoe behoerde.