Noordnederlandse Historiebijbel

34 capittel

Doe seide God tot Moyses: "Bereet twee stenen tafelen, gelijc die waren, die gi an stucken worpt. Daer sel Ic die 10 geboden in scriven. Ende weest morgen vroech op ende bereet ende coemt alleen tot Mi opt hoechste van den berge Synay." Doe ghinc Moyses van den berch ende troeste dat volc ende bereide die tafelen. Ende des morgens was Moyses vroech op ende ghinc opten berch Synay ende nam die tafelen mit hem, als hem God bevolen hadde. God, die Heer, daelde in die wolken. Doe stont Moyses ende riep den naem Gods an ende seide: "God, Here der Heren, wonderlic ende guedertieren, vreedsamich ende veel ontfermhertich, Gi doet ontfermherticheit in dusenden ende haelt die sonden ende quaetheit of ende Gi spaert die onnoeselen. Ende die soen moet die boesheit sijns vaders betalen ende des neven in die dorde of in die vierde geslacht." Doe viel Moyses op sine knyen op der aerden ende aenbede Gode ende seide: "Here, heb ic graci voir uwen aensicht gevonden, so bid ic

[fol. 49vb]

U: gaet mit ons, want dit volc is hertnackich, ende haelt onse quaetheit ende onse sonden van ons."

Doe seide God: "Mijn vrede sel mit u wesen. Ende Ic sel voir u teykenen doen, die nye gesien en sijn op der aerden onder enich volc. Bewaert ende hout al dat Ic u geseit hebbe. Ic sel voir u aensicht verjagen die Amorreen, Cananeen, Etheen, Pherezeen, ende Eveen ende Jebuseen. Ende wacht u, dat gi mit dien luden van dien lande geen vrientscap en hebt. Destrueert haer outaren, breect haer beelden, aenbeet geen vreemde goden, hebt geen vrede mit dat volc, noch hilict daer niet an. En maect gi geen geblasen noch gegoten goden. Hout die hoechtijt van Paeschen seven dagen lanc in die eerste maent van die lenten, doe gi uut Egipten ghinct. Ende alle knechtgins sel men Mi offeren, als si 8 dagen out sijn ende die weder lossen. Ende alle beesten die eerst gejonget sijn, die sel gi Mi offeren. Ende gi en selt voer Mi niet comen mit ydelre hant. Ses dagen sel gi wercken. Opten sevenden dach sel gi rusten. Gi en selt dan niet eren, noch saey en, noch maeyen. Als u coren gesaeit is, so sel gi hoechtijt houden. Ende als dat coren thuus is, so sel gi hoechtijt houden. Ende die eerste vruchten van den lande die sel gi offeren in dat huus Gods. Gi en selt geen geyten coken in die melc haer\re

[fol. 50ra]

moeder. Scrijft alle dese ponten ende openbaertse den kinderen van Ysrahel. Daer stont Moyses bi God 40 dagen ende 40 nachten, dat hi niet en at, noch en dranc. Doe screef God in die stenen tafelen die 10 geboden ende gafse Moyses.

Doe ghinc Moyses van den berch van Synay. Doe hi bi dat volc quam, doe en dorst Aaron noch sijn kinderen niet tot hem gaen, overmits die claerheit, die uut sinen ogen scheen, want het scheen, of daer cornuten op sijn hoeft gestaen hadden. Doe decte Moyses sijn aensicht mit een cleet ende riep dat gemeen volc tot hem ende openbaerde ende seide hem al dat hem God geboden hadde te seggen.