Noordnederlandse Historiebijbel

25 capittel

Doe seide God tot Moyses: "Segt den kinder van Ysrahel, dat si willichlic offerhande brengen. Ende dit is dat offer, dat gi van hem ontfangen selt: gout, sulver, alrehande manieren van syden lakenen ende vellen, ende hout van cethim, oly van olyven, ende welrukende cruden, ende duerbaer gesteenten om clederen te maken daer men My mede dienen mach. Ende gi selt Mi een tabarnakel maken ende vaten daerin, als Ic u openbaren sal.

Ende aldus sel gi die arke maken van hout van sethim: dat en rot niet, twee cubitus lanc ende enen halven, een cubitus ende een half breet, een cubitus ende een half hoech. Ende gi selt die arke buten ende binnen vergulden mit dat alrebeste gout. Ende gi selt boven om die arke maken een gulden croen. Ende an elken hoec van den arcke sel gi maken enen rinc van goude. Ende gi selt grendelen maken van hout van setym, doir die ringen stekende, ende vergulden die. Ende laetse altoes daerin bliven, opdat men die arke daermede dragen mach. Ende gi selt maken een propiciatorium: een stede, daer men in bidden sal voir der arken, an die een side van die tabarnakel ende maken dat van den puersten goude, twee cubitus ende een half lanc ende twee cubitus ende een half breet.

Ende an die ander

[fol. 46rb]

zide van den tabarnakel sel gi maken een tafel van hout van sethim - twee cubitus lanc ende een cubitus breet, ende een cubitus hoech ende een half - ende al vergulden, op 4 voeten staende. Ende om die tafel maect een gulden rinc ende grendelen van sethim die tafele mede te dregen ende al vergult. Ende op die tafel sel gi leggen 12 broden van licht deech ende op elc broet een pateen. Ende op die pateen een hantvol wyeroecs. Ende opten sabaoth sel men dat oude broet ofdoen. Ende dat en sel nyement eten dan die papen. Ende den wyeroec sel men dan barnen ende leggen dan daer ander broden ende ander wyeroec altoes opter tafelen.

Ende gi selt daer maken over dat oraculum een cherubin van goude ende des gelijc over die tafel een an die ander side van die tabarnakel, die hoefden jegen malcander staende." Ende haer vlogelen bedecten jegen malcander die arke. Ende die een vlogel van die cherubin bedecte dat oraculum. Ende die ander cherubin bedecte mit sinen vlogel die tafel.

Oec hiet hem God daer maken seven gulden candelaren mit gulden lampen, daer men die oly in dede die men voir die arken barnde, ende oec gulden vaten daer men

[fol. 46va]

balsom ende welrukende cruden in dede.

Oec hiet God maken gulden wyeroecvaten. Ende op elken kandelaer hiet hem God setten een gulden lantaerne mit licht, opdat die overal mocht lichten. Ende alle die vaten die men in die tabarnakel besichde, die waren vergult. Ende die roeden daer men dat licht mede ontstac ende uutdede, die waren al vergult.

Doe seide God: "Inspice, fac secundum exemplaer quod tibi monstratum est in monte."