Noordnederlandse Historiebijbel

24 capittel

Doe seide God voert tot Moyses: "Coemt weder hier tot My mit Aaron, Nadap ende Abyu, sijn kinder, ende mede die 70 oude vechters van Ysrahel. Ende aenbeet Mi van verre. Mer coemt gi alleen hier boven tot My." Doe ghinc Moyses tot den volc ende

[fol. 45vb]

screef alle die geboden, die hem God geseit hadde. Ende des morgens was Moyses vroech op ende maecte een outaer an den berch Synay. Ende die 12 geslachten deden daer God sacrificie. Ende doe las Moyses die kinder van Ysrahel over al die geboden, die hem God bevolen hadde. Doe seiden si alle gemeenlic: "Al wat ons God geboden heeft, dat sellen wi doen. Ende wi sellen Hem onderdaen wesen."

Doe ghinc Moyses, Aaron, Nadap ende Abyu, ende die 70 oude van Ysrahel an den berch Synay. Ende sy sagen God van Ysrahel als blinckende stenen van saphier.

Doe seide God tot Moyses: "Coemt opten berch tot My. Ic sel u twee stenen tafelen geven, daer die wet ende die geboden in gescreven staen. Die sel gi den volc leren." Doe stont Moyses op ende ghinc een stuc an den berch ende seide tot die 70 oude: "Ontbeit mijns hier, waent ic weder tot u come. Aaron ende Hur die sellen mit u wesen. Ende gesciet daer yet onder dat gemeen volc, sent die daer, dat sise te vreden scicken." Doe ghinc Moyses opten berch ende die wolken die bedecte hem, ende was daer ses dagen. Des sevenden dages doe riep God Moyses tot Hem int hoechste des berchs.. Ende daer was die glorie Gods als een barnende vuer op dat hoechste van den berch. Ende dat vuer sagen alle die kinder van Ysrahel.

[fol. 46ra]

Moyses ghinc op dat hoechste des berchs ende was daer 40 dagen ende 40 nachten.