Noordnederlandse Historiebijbel

26 capittel

Doe seide God tot Moyses: "Die tabarnakel die is een tent. Die sel gi maken van menigerhande siden laken als van bissen van retorten, van jacincten, van coccen van tincten ende van purpur. Ende die tabarnakel was 30 cubitus lanc, 10 cubitus wijt, 10 cubitus hoech. Die pylaernen waren van hout van cethim ende al vergult. Die lynen ende repen waren van menigerhande side. Die staken waren van coper ende boven vergult. Ende int oest was den inganc van den tabarnakel. Ende alle die cyerheit ende wonderlicheit die om die tabarnakel ende daerin was, dat waer te lanc te scriven. Daerom sel ict cort overgaen. In die tabarnakel hinc een gordijn an 4 vergulden pylaernen, die van syden lakenen scierlic ende

[fol. 46vb]

wonderlic gewrocht was. Ende in die gordijn was gewrocht menigerhande vorwe van blomen ende ander cyerheit. Van den inganc totten gordinen toe dat was lanc 20 cubitus ende dat hiet Sancta. Ende binnen der gordinen wast 10 cubitus lanc ende 10 wijt. Ende die tabarnakel was binnen alom bescoten mit hout van cethim ende daerop vergult. Ende dat binnentste deel hiet Sancta sanctorum. Daer stont die arke in ende dat oratorium ende die tafel ende die candelaeren ende al die ander cyerheit, voirgenoemt. Ende die tabarnakel was bedect mit menigherhanden decsel. Dat binnentste decsel was van 4 manieren van syden lakenen. Dat een was bissen; dat is wit van vorwen. Dat ander was jacinct; dat is blaeu. Dat dorde was purpur; dat is geel. Dat vierde dat was van cocce; dat is roet. Die 4 siden lakenen waren tesamen gewrocht ende dat was dat overste decsel. Daerover was een decsel van geytshaer wonderlic gewrocht. Daerboven was een decsel van scaepsvellen getouwet ende daerbovenover ruuch scaepsvellen, gevorwet als jacinct, ende so voert tot 10 decselen toe ende al cyerlic gewrocht. Ende buten om die tabarnakel daer waren tafelen, gemaect van hout van cethim ende vergult,

[fol. 47ra]

ende gulden ringen daeran ende grendelen mede te dragen, ende al cyerlic ende wonderlic gewrocht ende vergult.