Noordnederlandse Historiebijbel

19 capittel

Ende in die dorde maent nadat die kinder van Ysrahel uut Egypten togen, so setten si haer tenten op den berch van Synay.

Doe riep God Moyses op den berch ende seide tot hem: "Segt dit dat huys Jacobs ende boetscapt den kinderen van Ysrahel, dat gi gesien hebt ende dat Ic die van Egipten gedaen hebbe ende hoe Ic u vandaen verlost hebbe. Est dat si mijn stemme horen ende mijn geboden bewaren, so sellen si Mi wesen een heymelic geselscap boven anderen volc, want al aertrijc is mijn. Ende gi selt My wesen een heylich volc. Sect dat den kinderen van Ysrahel." Doe ghinc Moyses ende riep dat gemeen volc tesamen ende sonderlinge die outste ende die mogenste. Ende hi seide hem wat hem God bevolen hadde te seggen. Doe

[fol. 44ra]

andwoerden dat gemeen volc ende seiden: "Wat God ons geboden heeft, dat willen wi doen." Doe ghinc Moyses op dien berch in die wolken ende seide tot God dat dat volc sijn geboden wouden houden. Ende dat volc hoerde Moyses mit God spreken.

Doe seide God tot Moyses: "Gaet totten volc ende heylichse huden ende morgen. Ende laetse haer dwaen ende reynigen ende niet bi haren wiven wesen. Ende laetse opten dorden dach bereet wesen ende set dat volc om den berch. Ende segt hem dat hem een ygelic wacht, dat si binnen die palen van dien berch niet en comen, noch den berch niet en raken, op die doot: men scen noch beesten." Doe ghinc Moyses van den berch ende seide dat al den volc al dat hem God bevolen hadde. Ende dat volc dede also.

Ende opten dorden dag des morgens doe hoerde dat volc donreslagen ende sagen blixemen. Ende een wolken bevinc dien berch. Doe was al dat volc vervaert. Ende Moyses namse uut den tenten ende settese omtrent die berch. Ende den berch Synay die roecte als een oven, want God was daer in den vuer.

Doe riep God Moyses ende Moyses ghinc opten berch. Doe seide die Here tot Moyses: "Dat gemeen volc en mach opten berch

[fol. 44rb]

niet. Setse omtrent den berch ende heilichtse."

Doe seide God tot Moyses: "Gaet van den berch ende segt den priesteren ende den volc, dat si niet en gaen binnen den palen, opdat si niet gedoot en worden. Ende coemt gi ende Aaron op den berch." Doe ghinc Moyses of ende vertelde den volc wat God geseit hadde. Ende hi ghinc mit Aaron op den berch.