Noordnederlandse Historiebijbel

18 capittel

Doe Yetro, die paep van Madian, hoerde, Moyses sweer, die wonderlicheit die God Moyses dede onder die kinder van Ysrahel, doe nam hi sijn dochter Sephora, Moyses wijf, ende sijn twee kinderen, die hi daer gelaten hadde - dat een kint hiet Gersan ende dat ander kint hiet Eleazar - ende ghinc daermede tot Moyses ende seide: "Hier brenge ic u wijf ende uwe kinderen." Ende Moyses ontfincse vriendelic ende cussetse.

Ende hi lede Yetro, sijn sweer, in sijn tabarnakel ende vertelde hem hoe God Pharo ende al Egipten geplaget hadde om die kinder van Ysrahel te verlossen. Doe Yetro dat hoerde, doe seide hi: "Ghebenedijt moet die Here wesen, die u verloste van Pharons handen ende sijn volc bescermt heeft van die van Egipten. Nu ken ic dat Hi een groet Heer is boven allen goden." Ende Yetro dede den almachtigen God sacrifici. Doe quam Aaron ende die outste des volcs van Ysrahel ende aten daer mit

[fol. 43va]

Yetro, Moyses sweer. Des anderen dages doe sat Moyses te recht van des morgens tot des avonts om dat volc te rechten dat voir hem quam. Doe dat Yetro sach, dat Moyses dat volc alleen berechtede, doe seide hi tot hem: "Waerom sit gi dus alleen te recht over al dit volc van allen sake, van den uchtent totten avont?" Doe seide Moyses: "Dit volc comt tot my ende soect raet, wat si doen sellen. Ende is daer enige bedriegen onder hem, so comen si tot mi, omdat ic dat oerdelen sel ende dat ic hem die geboden Gods ende die wet seggen sel." Doe seide Yetro: "Gi en duet niet wiseliken, dat gi al dit volc alleen wilt berechten. Gi en hebt die craften niet; gi en moechtet niet alleen volbrengen. Mer hoert mine woerden ende doet minen raet. God sel mit u wesen. Gi selt onder dat volc wesen als die overste ende gi selt hem openbaren die sacrificien, waer si gaen sellen ende wat si doen sellen. Ende gi selt verkyesen uut al den volc machtige mannen die God ontsien ende die waerachtich sijn ende giricheit haten. Die sel gi setten over dat volc te rechten. Die een over 100, die ander over vijfhondert, die dorde over 1000. Ende si sellen dat

[fol. 43vb]

gemeen volc dagelix berechten van cleynen saken. Mer van groten saken sel gi selve rechten. Doe gi also, so sel dat volc mit rusten comen in hare stede daer si wesen willen." Doe dat Moyses gehoert hadde, doe dede hi alsoe als hem Yetro, sijn sweer, geseit hadde ende sette strenge rechters over dat volc van Ysrahel, die dat volc alle dage recht deden. Mer grote, swaer saken die rechte Moyses. Ende doe toech Yetro weder thuuswaert in sijn lant.