Noordnederlandse Historiebijbel

17 capittel

God hadde geset een witte wolken des dages voer die kinder van Ysrahel ende des nachts een vuerige calumpne. Ende als si des dages reysen souden, so verhief haer die wolken ende ginc voer. Ende so volchden die kinder van Ysrahel na. Aldus quam Moyses mit sijn volc in Raphadin. Ende daer en hadden si geen water te drinken. Doe keven si jegen Moyses ende seiden: "Geeft ons water, dat wi drinken mogen. Waerom heb gi ons uut Egipten

[fol. 43ra]

geleet? Wi ende onse kinderen ende onse beesten die sellen hier al van dorst sterven." Doe riep Moyses an God ende seide: "Here, wat sel ic mit desen volc doen? Blijf ic bi hem, si sellen mi stenen."

Doe seide God tot Moyses: "Gaet tot dat volc ende neemt mit u die outste van Ysrahel, ende neemt u roede in u hant ende gaet an den berch Oreb an den steen. Ende Ic sel daer voer u staen. Slaet op den steen. Daer sel water uutgaen, dat dat volc mach drinken." Moyses dede also voir die kinder van Ysrahel ende daer quam water uut den steen ende si dronken daerof.

Doe quamen die van Amelech in Raphadin om te vechten jeghen die kinder van Ysrahel. Doe seide Moyses tot Josue: "Kiest cloke mannen uut ende gaet vechten jegen Amelech. Ic sel op den berch Gods gaen ende bidden voer u." Josue dede als hem Moyses hiet ende vacht jegen Amelech. Moyses, Aaron ende Hur die ghingen opten berch. Ende Moyses verhief sijn handen te hemelwaert ende bat an Gode. Ende dan wonnen die van Ysrahel. Ende als Moyses sijn handen nederhielt, so wan Amelech. Doe dat Aaron ende Hur sagen, doe namen si stenen ende onderscoerden Moyses armen daermede, sodat sijn handen altoes te hemelwaert waren. Ende doe versloech Josue Amelech mit al sijn volc.

Doe seide God tot Moyses: "Scrijft dat

[fol. 43rb]

in uwer gedachten ende in enen boec ende geeft die Josue. Ic sel die gehoechnisse van Amelech van der aerden doen." Ende dat gesciede onder coninc Saul. Die versloechse ende maectese teniet. Ende daer maecte Moyses een outaer ende bat daer den naem Gods an.