Noordnederlandse Historiebijbel

16 capittel

Ende doe murmureerden die kinder van Ysrahel jegen Moyses ende Aaron in der woestinen ende seiden: "Wy wouden dat wi in Egipten van den handen Gods gestorven hadden,

[fol. 42rb]

daer wi saten bi onsen vleispotten ende wi hadden broets sat na onsen wille. Waerom heb gi ons daeruut geleet? Ende wi sellen hier in der woestinen sterven van honger."

Doe seide God tot Moyses: "Ic hebbe die murmuracie der kinder van Ysrahel gehoert ende sect hem: Tavont sellen si vleis eten ende morgen sel Icse versaden mit brode. Ende gi selt weten, dat Ic u Here ende u God ben. Morgen vroech sel Ic broet doen regenen van den hemel. Laet u volc dan uutgaen ende vergaren dat voir enen dach. Mer opten sesten dach so sellen sijt voir twee dagen vergaderen."

Doe seide Moyses ende Aaron totten kinderen van Ysrahel: "Gi weet wel dat u God des avonts lede uut Egipten. Ende des morgens saech gi die glorie Gods ende dat Hi u vertroestede. Ende u murmuracie is voir Gode gecomen. Wat sijn wi? U murmureren en is niet jegens ons mer jegen God. Tavont sel u God vleis verlenen te eten ende morgen sel Hi u saden van brode." Des avonts doen quamen onder die kinder van Ysrahel in haer tenten gebraden quattelen. Ende elc mens nam daer quattelen also

[fol. 42va]

voel, als hi geerde te eten. Ende des morgens vroech doe lach alomme op dat velt, oft een witten rijp geweest hadde. Ende doe die kinder van Ysrahel dat sagen, doe seiden si onderlinge: "Wat is dit?" Doe seide Moyses: "Dit is broet dat u God van den hemel gesent heeft, omdat gi dat eten selt. Hoert wat u God daerof gebiet. Een ygelic mens sel dit broet een maet vol nemen alle dage voer elc van sijn huusgesin. Ende opten sesten dach selt een ygelic twee maten nemen, want opten sabbaoth en selt niet comen." Doe deden die kinder van Ysrahel als Moyses hem beval. Mer die somme meenden des anderen dages gebrec te hebben ende namen meer dan een maet. Ende wat hem des avonts overbleef, dat waren des morgens wormen ende stanc. Mer wat broet dat opten sesten dach overbleef jegen den sabbaoth, dat en wormde niet. Mer daer waren somme menscen, die opten sabbaoth niet en achteden ende ghingen uut om dat broet te nemen. Mer si en vonden dan niet.

Doe seide God tot Moyses: "Waerom en doet dat volc niet, als Ic hem geboden hebbe ende houden mijn wet? Ic laet opten sesten dach dubbelt broet comen, omdat gi opten

[fol. 42vb]

sevenden dach rusten sout, want den sevenden dach is heilich. Daerom blive een ygelic in sijn tabarnakel opten sabbaoth ende heilich dien dach." Ende dat hemelsche broet manna dat was gedaen als greynen van witten coryander. Ende wat smake dat die menschen begheerden, die hadden si in dat broet. Ende als die sonne des morgens dat broet opten velde besceen, so ghinct teniet. Doe seide Moyses tot Aaron: "God hevet mi u bevolen te seggen: Nemet een maet van manna ende doet dat in een vat ende bewaert dat in u tabarnakel om dat toecomende geslacht van Ysrahel te tonen." Aaron nam een gouden pot ende die dede hi vol manna ende bewaerde die in sijn tabarnakel.

Die kinder van Ysrahel leefden 40 jaer van manna, dat hemels broet, also lange waent si quamen int lant van Canaan.