Noordnederlandse Historiebijbel
(1998)–Anoniem Noordnederlandse Historiebijbel–
Auteursrechtelijk beschermd
[Folio 40vb]
| |
vrouwen, dat knechtghins sijn van den kinderen van Ysrahel, die sel gi Mi offeren. Ende die sellen heilich wesen. Ende die sel gi lossen mit enen lam of mit twee tortelduven of twee ander duven ende mit vijf sulveren penningen. Ende alle die eerste beesten die eerst gejonget worden, die sel gi My offeren. Ende als gi gecomen sijt int lant dat Ic u beloeft hebbe, so sel gi gedencken, hoe Ic u uut Egipten verloste. Ende alle jaer so sel gi opten 14den dach van der eersten maent een lam braden ende eten, als voirseit is. Ende dan sel gi 7 dagen hoechtijt houden ende vieren ende geenrehande werck doen dan spijs koken. Ende binnen die 7 heilich dagen en sel gi geen swaer broet eten dat mit heefdeech ghebacken is. Mer gi selt licht broet eten, in den haert gebacken. Ende of u die kinder van Ysrahel vragen, waerom dat gi hem die manier ghebiet te houden, so sel gi hem seggen: Die sterke hant Gods, die verloste ons uut Egipten van coninc Pharo. Ende daerom sellen wi dien dach gedenken ende eren ende anbeden Gode op dien dach der hoechtijt." |
|