Noordnederlandse Historiebijbel

12 capittel

Doe seide God tot Moyses ende tot Aaron: "Dees maent sel wesen die

[fol. 39vb]

eerste maent van den jaer. Ende gaet nu tot al den volc van Ysrahel ende sect hem, dat een ygelic huysvader opten tienden dach van deser maent een lam neme dat niet jarich en is ende onbesmit is, een ramlam, ende bewaert dat tot opten viertienden dach van deser maent. So sel gi des avonts dat lam offeren. Ende neemt van den bloede ende bestrijct daermede die posten van den huse, die doerstilen, die overdoren ende die dorpelen. Ende dan sel gi dat lam braden ende des avonts al op eten. Ende so wie niet huusgesin genoech en heeft dat lam op te eten, so sellen die gebueren een lam tesamen braden ende eten tesamen. Ende als dat lam gebraden is mit hoeft ende mit voeten, so sel gi dat haestelic eten, al staende sonder snyden, ende geen been breken, mer scorent mit den handen ende etent mit licht broet mit den sape van latuwe. Ende u lenden sellen opgescort wesen. Ende gi selt stocken in u hant hebben ende wesen bereit te gaen. Ende wat daer van dat lam blijft, dat sel men vlus verbarnen in den vuer: hoeft, voeten ende ingedomt. Ende dien dach sel gi hebben in uwen memorien ende vyeren dien dach onder u geslacht tot in der ewicheit. Ende 7 dagen sel gi vieren aneen. Ende gi en selt geen werc doen dan totter spisen hoert te bereiden. Ende opten 14den dach van dier maent so sel gi altoes gemeenlic eten licht broet,

[fol. 40ra]

sonder heefdeech gebacken, 7 dagen lanc, tot opten 21sten dach van dier maent." Doe God dit tot Moyses geseit hadde, doe riep Moyses die outste van Ysrahel ende oec al dat gemeen volc, ende seide tot hem al dat hem God bevolen hadde te seggen ende te doen. Ende hi seide hem, hoe si dat lam souden eten ende die manier houden tot in der ewicheit. Ende doe neychden al die kinder van Ysrahel ter aerden ende anbeden God. Ende si deden, also als hem Moyses bevolen hadde. Ende doe die tijt quam die God gescict hadde, doe aten die kinder van Ysrahel dat lam gebraden, als God tot Moyses seide.

Het is gesciet op der middernacht. Doe sloech God alle die eerstgeboren menschen in Egipten, van Pharons hof tot die in der kerker lagen, ende daertoe alle die beesten die eerst gejonget waren. Doe stont Pharo op in der nacht, ende al sijn gesin ende al dat gemeen volc van Egypten. Ende daer was een groet gescrey in Egypten, want daer en was niet een huys, daer en was een dode in.

Doe geboet Pharo dat Moyses ende Aaron ende al haer volc ende al haer kinderen uut Egypten souden gaen ende doen haer God sacrifici, "als Gi geseit hebt. Ende neemt u scapen ende al u beesten mit u." Ende dat gemeen volc dwongen die kinder van Ysrahel, dat si haestelic uut Egypten souden gaen. Ende si seiden: "Blijft gi hier langer, wi sellen alle sterven."

[fol. 40rb]

Doe togen die kinder van Ysrahel uut Egipten ende namen mit hem al haer guet, dat si vueren ende dragen mochten. Haer gebuelt meel dat bonden si in clederen ende drogen dat op haren halse. Haer kinder ende haer ander guet dat loeden si op wagenen ende op beesten. Ende si namen mit hem die goude, sulveren vaten. Ende die clederen die si geleent hadden, die voerden si mit hem ende beroefden alsoe Egipten, als hem God bevolen hadde.

Scolastica seit: Doe Moyses metten kinderen van Ysrahel ruumde, doe was die ryvyer Nylus so vol van water, dat die stede daer Joseph begraven was, onder water was. Doe screef Moyses ons Heren naem in een gulden plaet ende leide die opt water ende bad God, dat Hi hem openbaren woude, waer dat Josephs gebeente lach. Doe dreef die plaet op sijn graf. Ende doe nam Moyses dat gebeent van Joseph ende voerdet int Lant van Beloften, als hem God beloeft ende gesworen hadde. Doe Moyses dat gebeent antastede, doe sprac dat gebeent ende voirseide Moyses wat hem gescien soude in der woestinen. Ende daer quam onversien een scaep bi dat gebeent. Ende dat scaep sprac tot Moyses ende Moyses nam

[fol. 40va]

dat scaep mit hem ende was menich jaer by hem in der woestinen ende hietede Josephs scaep. Ende doe die van Ysrahel uut Egipten ghinghen, doe wast aertbevinghe, soedatter voel castelen nedervielen. Ende alle die afgoden vielen van Egipten neder. Ende dit gesciede 400 jaer ende 30 nadat God Abraham geloeft hadde dat lant te geven. Ende het was na Josephs doot 100 ende 54 jaer. Ende der kinder van Ysrahel die uut Egipten togen, mannepersonen die boven 20 jaren out waren, dier wasser 600.000, een dusent 700 ende 30 mannen, behalven wiven ende kinderen. Ende alle die van Levy gecomen waren, die en waren niet getelt. Ende die beesten die si mit hem leyden, daer en was geen getal an.

Die kinder van Ysrahel ruumden dat lant van Egypten bi nacht. Ende daer ghinc tsnachts een vurige calumpne ende des daechs een witte wolken die hem den wech wijsde. Ende si togen een woeste wech jegen den berch van Synay, totdat si quamen op dat Rode Meer. Die aerde van dien lande was roetachtich ende daerof hadde dat water rode vorwe.