11 capittel
Doe seide die Heer tot Moyses: "Noch sel Ic Pharo eens plagen; dan sel hi u laten gaen. Daerom sect al u volc, dat die mannen lenen van haren vrienden ende die wiven van haren gebueren sulveren ende goude vaten. God sel sijn volc gracie doen voir die van Egipten." Want Moyses was groet gheacht onder die van Egipten. Doe seide die Heer tot Moyses: "Op die middernacht so sullen sterven in Egipten alle die eerstgeboren in elc huus, van Pharons hof tot der dierne die in die molen dient. Ende des gelijc sellen sterven alle die beesten die eerst gejonget sijn. Ende daer sel also groet verdriet wesen in Egypten, dat nye des gelijc gehoert en was onder die van Egipten. Ende onder die kinder van Ysrahel en sel in dier nacht niet een hont bassen, opdat gi weten moghet dat God u by myrakel sceit van die van Egipten."
Auteursrechtelijk beschermd