Noordnederlandse Historiebijbel

10 capittel

Doe seide die Here tot Moyses: "Gaet tot Pharo ende sect hem dat hi mijn volc laet varen in der

[fol. 39ra]

woestinen, opdat si Mi mogen sacrificie doen, of Ic sel Egypten noch swaerliker plagen. Ende sect dat voir al sijn gesin ende voir al sijn volc." Moyses ende Aaron die ghingen tot Pharo ende seiden hem dat. Doe seide Pharons ghesin ende al sijn volc: "Hoe lange sel gi dit volc dus quellen? Het is scande, dat gise dus hout. Laet die menschen gaen, opdat si haren Here ende haren God sacrificie mogen doen. Sie gi niet hoe Egipten vergaet?" Doe seide Pharo: "Wie souden si wesen, die in der woestinen souden gaen?" Doe seide Moyses: "Die jonghen mitten ouden, mannen ende vrouwen, scapen ende alle beesten, want het is hoechtijt ons Heren Gods." Doe seide Pharo: "Mi twivelt dat gi quaet denct, mer alsoe en selt niet gescien. Mer gaet, gi mannen, ende doet uwen God sacrifici ende laet die vrouwen ende die kinderen hier bliven." Dat en woude Moyses niet doen. Doe wort hi van coninc Pharo verdreven.

Doe seide die Here tot Moyses: "Reyct u hant uut over al dat lant van Egipten." Moyses dede dat. Doe verhief daer een barnende vint int lant van Egipten ende stont enen dach ende enen nacht. Ende doe quamen daer krekelen of sprinchanen ende vervolden dat lant van Egipten ende aten al dat groen cruut op dat in Egipten was an bomen,

[fol. 39rb]

cruden, loveren ende gras. Doe ontboet Pharo Moyses ende Aaron ende seide: "Ic hebbe jegen uwen Here ende God gesondicht ende jegen u, mer vergeeftet mi ende bidt uwen God dat Hi van ons hale dese plage." Moyses ghinc van Pharo ende bad an God. Doe dede God een stercke wint waeyen van westen ende woey al die krekelen in die Rode Zee, soedatter niet een in Egipten en bleef. Noch was Pharo also verhert, dat hi die kinder van Ysrahel niet en woude laten varen.

Doe seide God tot Moyses: "Verheft u hant tot in den hemel." Moyses dede also. Doe wortet doncker over al Egipten, dat nyement den anderen en mocht sien. Noch nyement en dorst gaen van der stede daer hi was. Ende dat duerde 3 dagen lanc. Mer waer die kinder van Ysrahel waren, daer wast licht.

Doe riep Pharo Moyses ende Aaron tot hem ende seide: "Gaet ende doet God sacrifici, mer laet u scapen ende u beesten hier bliven, ende neemt u kinderen mit u." Doe seide Moyses: "Al onse beesten die sellen mit ons gaen. Wy en sellen hier niet enen nagel daerof laten." Doe was Pharo verhert ende

[fol. 39va]

seide tot Moyses: "Gaet van my ende wacht u, dat gi voer mijn aensicht niet en coemt. Ende so wat tijt dat gi voer mi coemt, so sel gi sterven." Doe seide Moyses: "Amen. Dat moet gescien, dat gi geseit hebt, want ic en sel voertan u aensicht niet sien."