Noordnederlandse Historiebijbel

9 capittel

[fol. 38va]

Doe seide die Here tot Moyses: "Gaet tot Pharo ende sect hem dat hi mijn volc laet gaen in der wostinen, opdat si mi mogen sacrificie doen. Wil hijt niet doen, so sel Ic die beesten verslaen die in den acker sijn. Ende dat sel morgen gescien." Pharo en woude dat volc niet laten gaen. Doe sloech God alle die beesten doot die in Egipten waren op den velde: ezelen, camelen, ossen, scapen ende alle beesten. Mer der kinderen beesten van Ysrahel en misschiede niet. Ende Pharo sende in Gessem onder die kinder van Ysrahel om te besien of haer beesten yet doot waren. Ende hem en was nyet misschiet. Doe was Pharo verhert ende en woude dat volc niet laten varen.

Doe seide die Here tot Moyses ende tot Aaron: "Neemt u hant vol asschen uut den ovenen ende laetse vliegen in der luchten voir Pharo." Moyses ende Aaron die namen die assche uut den ovenen ende lietense voir Pharo vliegen in der luchten. Ende al dat volc van Egipten wort daer geplaecht mit puusten ende mit swellen ende mit seerten, ende des gelijc alle die beesten van den lande. Ende Pharo gokelaren die en mochten voir Pharo niet staen van seerten. Noch was Pharo verhert ende en woude dat volc Gods niet laten varen.

[fol. 38vb]

Doe seide die Here tot Moyses: "Staet morgen vro op ende gaet tot Pharo ende sect hem dat hi mijn volc laet varen, of Ic sel hem swaerlic plagen mit sulker plage, die nye gesien en was." Ende die somme van Pharons volc, die God ontsagen, die deden haer beesten binnen den husen ende die ander lietense in den velde. Doe hief Moyses sijn hant mit sinen roede ten hemelwaert. Doe dedet God donren, hegelen, regenen ende blixemen, dat alle die menschen ende alle die beesten die buten den huse waren, die bleven doot. Ende alle die bomen worden gescoert ende verderft. Ende alle vruchten van coorn ende van anderen cruden die ghingen teniet. Mer int lant van Gessem onder die kinder van Ysrahel daer en misschiede niet. Doe ontboet Pharo Moyses ende Aaron ende seide tot hem: "Ic heb gesondicht tegen den rechtvaerdigen God mit mijn onsalich volc. Bidt uwen Here, uwen God, dat Hi den donre ende den hegel doet vergaen. Ic sel u laten gaen ende niet langer houden." Doe seide Moyses: "Ic sel gaen uut deser stede ende bidden God an." Doe verghinc dien donre ende dat onweder. Ende doe Pharo dat sach, doe wort hi verhert ende en woude dat volc Gods niet laten varen, als hi geseit hadde.