Noordnederlandse Historiebijbel

8 capittel

Doe seide die Heer tot Moyses: "Gaet mit Aaron tot coninc Pharo ende sect hem, dat hi mijn volc laet varen, opdat si Mi mogen sacrifici doen. Wil hi dat niet doen, so sel Ic al dat lant plagen mit vorschen." Pharo en woudse niet laten varen. Doe verhief Aaron sijn hant over al die wateren ende al dat lant quam vol vorschen. Si cropen in die husen, in cameren, in bedden, in ovenen, in potten, in ketelen, in alle spise. Doe riep Pharo Moyses ende Aaron ende seide: "Bid uwen God dat Hi dese vorschen van ons neme. Ic sel sijn volc laten va\ren

[fol. 38ra]

ende laten hem sacrificie doen." Doe seide Moyses: "Hoeneer sel gise laten varen?" Doe seide Pharo: "Morgen." Doe seide Moyses: "Op dat woert sel ic Gode bidden, opdat gi weten moecht, datter geen God en is dan Hi, die onse God is." Doe bat Moyses an Gode. Ende alle die vorschen verghingen ende bleven al doot. Doe Pharo den plaech van den vorschen quijt was, doe en woude hi die kinder van Ysrahel niet laten varen.

Doe seide die Here tot Moyses: "Sect Aaron dat hi mit u roede slaet in dat stof op der aerden. Daer sellen mosyen of comen over al Egipten." Aaron sloech mit die roede int stof der aerden ende dat lant quam vol mosyen, sodat si die menscen ende die beesten int lijf vlogen ende en mochten nyewaert dueren. Pharons gokelaers die wouden die moysien verdriven, mer si en haddent gene macht. Doe seiden si tot Pharo: "Hier is die vinger Gods." Noch en woude Pharo dat gebot Gods niet horen.

Doe seide die Here tot Moyses: "Staet morgen vroech op ende gaet tot Pharo ende sect hem dat hi mijn volc laet varen, opdat si Mi sacrificie doen. Ende en wil hijt niet doen, so sel Ic Egipten plagen mit vliegen." Moyses ende Aaron die gingen tot Pharo ende seiden hem dat. Mer hi en woude dat volc Gods niet laten gaen. Doe sende God dat lant van Egypten al vol vliegen. Ende dat was des an\deren

[fol. 38rb]

dages. Ende daer worden si of geplaecht, sodat si norgent rust en hadden in husen in cameren. Mer int lant van Gessem daer en waren geen vliegen onder die kinder van Ysrahel.

Doe seide Pharo tot Moyses ende Aaron: "Gaet ende doet uwen God sacrifici hier in Egypten." Doe seide Moyses: "Dat en mach niet wesen, dat wi onder dit volc onsen God souden sacrifici doen, want die somme van Egipten die aenbeden enen stier, in Sarafis eren, haren god. Ende die somme anbeden een koe in Usis, haren godynnen, eer. Ende die somme anbeden enen ram in haers gods eren, Amon. Ende waert dat wi enich van dien beesten doden, dat gemeen volc soude ons stenen. Mer God heeft ons geseit dat wi 3 dachvaerden in der woestinen souden gaen ende doen God sacrifici." Doe seide Pharo: "Ic sel u laten gaen, dat gi uwen God sacrifici doen moecht in der woestinen, opdat gi voer mi bidt." Doe seide Moyses: "Ic sel gaen bidden voir u." Doe bat Moyses ende die vliegen verghingen. Noch en woude Pharo dat volc Gods niet laten varen.