Noordnederlandse Historiebijbel

7 capittel

Doe seide die Here tot Moyses: "Aaron, u broeder, die sel u voirspraec wesen. Sect hem, dat hi die teyken van die roede doet voer Pharo. Moyses ende Anna ginghen tot Pharo." Doe was Moyses 80 jaer out ende Aaron 83 jaer out.

Moyses ende Aaron die ghinghen tot Pharo. Doe si voir Pharo quamen, doe nam Aaron Moyses roede ende warpse voir Pharo ende voir sijn gesin. Ende die roede verwandelde in een draec. Doe riep Pharo sijn gokelaers ende sijn tovenaers. Die een hiet Jannes ende die ander hiet Mambier. Die worpen haer roeden ter aerden ende die verwandelden in draken. Mer Aarons roede verswalch der gokelaers roeden. Doe was Pharo verhert ende en hoerde Gods ghebot niet.

Doe seide die Here tot Moyses: "Gaet morgen tot Pharo, daer hi op die vloet staet ende neemt u roede in u hant ende sect tot hem: Die Here, die God der Ebreeuscher menschen, die heeft mi tot u gesent ende seit dat gi sijn volc sout laten gaen ende dat si Hem sacrifici mochten doen in der woestinen. Wil hi u niet laten gaen, so sect Aaron dat hi mit sijn roe\de

[fol. 37vb]

sla in die vloet. Ende alle die wateren van Egipten sellen verwandelen in bloet." Moyses ende Aaron deden, als hem God geboet. Hi sloech mit die roede in dat water voir coninc Pharo ende voer sijn gesin. Ende dat water verwandelde in bloet in allen ryvieren ende in allen putten. Ende alle die visschen die daerin waren, die storven ende die wateren die stoncken. Mer onder die kinder van Ysrahel in Gessem daer was claer water. Ende Pharons gokelaers die deden oec dat water verwandelen in bloet. Ende die van Egipten dolven ander putten, daer water in quam, daer si uut droncken. Ende dat water was also 7 dagen verwandelt in bloet in Egypten.